مێشوولە؛ مەترسیدارترین بکوژ لە جیهاندا کە ساڵانە گیانی زیاتر لە 700 هەزار کەس لە نێو دەبات 

وێستگە ستایل - سۆلین عوسمان 

ناوەندەکانی کۆنترۆڵکردن و خۆپاراستن لە نەخۆشییەکان لە ئەمریکا (CDC)، مێشوولەیان وەک "مەترسیدارترین گیانلەبەری سەر زەوی" پۆلێن کردووە. بەپێی ئامارە فەرمییەکان، ئەم مێرووە وردیلەیە ساڵانە بەرپرسە لە گیانلەدەستدانی زیاتر لە 700 هەزار کەس لە سەرانسەری جیهاندا، ئەوەش بەهۆی گواستنەوەی چەندین نەخۆشیی کوشندە و ڤایرۆسی.

بەگوێرەی ڕاپۆرتێکی ڕۆژنامەی "نیویۆرک پۆست"، مێشوولە سەرەڕای بچووکیی قەبارەکەی، هۆکاری سەرەکیی گواستنەوەی پەتایە هەرە ترسناکەکانە بۆ ناو جەستەی مرۆڤ. ئەم بابەتە نیگەرانییەکی جیهانی دروست کردووە، بەتایبەت کە زۆرینەی قوربانییەکان لە ناوچە دواکەوتووەکان و کیشوەری ئەفریقان.

نەخۆشیی "مەلاریا" لە سەرووی لیستی ئەو مەترسییانەدایە کە مێشوولە دەیگوازێتەوە، کە بە تەنیا ساڵانە دەبێتە هۆی مردنی پتر لە 700 هەزار کەس، کە زۆربەیان منداڵانی باشووری بیابانی گەورەی ئەفریقان. هەروەها مێشوولە هۆکارە بۆ بڵاوبوونەوەی "تای دێنگی" کە ساڵانە ٤٠٠ ملیۆن کەس تووش دەکات، و "تای زەرد" کە ساڵانە گیانی 82 هەزار کەس دەدروێتەوە، لەگەڵ "هەوکردنی مێشکی ژاپۆنی" کە ڕێژەی مردن تێیدا دەگاتە 30٪ی تووشبووان.

لە ڕووی زانستییەوە، لە کۆی زیاتر لە 3,700 جۆری جیاوازی مێشوولە لە جیهاندا، تەنیا بەشێکی کەم و دیاریکراویان مەترسیی ڕاستەقینەن و نەخۆشی دەگوازنەوە. زۆرینەی جۆرەکانی تر تەنیا وەک سەرچاوەی بێزارکردنێکی کاتی دەمێننەوە و کاریگەرییان تەنیا لە خوران و سووربوونەوەی پێستدا کورت دەبێتەوە.

ئەم ئامارە ترسناکانە دەریدەخەن کە مێشوولە نەک تەنیا مێروویەکی بێزارکەر، بەڵکو گەورەترین هەڕەشەی بایۆلۆژییە بۆ سەر مرۆڤایەتی، ئەمەش وایکردووە ڕێکخراوە تەندروستییەکان هۆشداری توند لەبارەی خۆپاراستن و بنبڕکردنی شوێنی مانەوەیان بدەن.

سەرچاوە: نیویۆرک پۆست - CDC

PM:03:11:14/08/2026

ئه‌م بابه‌ته 240 جار خوێنراوه‌ته‌وه‌‌