باشترین میوەکان بۆ تووشبووانی شەکرە: ئەو جۆرانەی یارمەتی کۆنتڕۆڵکردنی شەکر دەدەن

وێستگە ستایل - سۆلین عوسمان

پسپۆڕانی پزیشکی بەردەوام ئامۆژگاری ئەوە دەکەن کە میوە بکرێتە بەشێک لە پارێزی هاوسەنگی ئەو کەسانەی تووشی نەخۆشی شەکرە بوون. ئاماژە بەوە دەکەن کە هەندێک جۆری میوە دەتوانن یارمەتیدەر بن لە ڕێکخستنی ئاستی شەکر لە خوێندا ئەگەر بە بڕی گونجاو بخورێن.

لە نێوان ئەو میوانەی زۆرترین جار پێشنیار دەکرێن بریتین لە: توتڕک (Berries)، سێو، هەرمێ، پرتەقاڵ، کیوی، قۆخ، گێلاس و گریپ فروت. ئەم میوانە دەوڵەمەندن بە ڕیشاڵ

(Fiber)، ڤیتامین، کانزا و دژە ئۆکسانەکان، لە کاتێکدا زۆر بە هێواشی ئاستی شەکر لە خوێندا بەرز دەکەنەوە بەراورد بەو خواردنانەی شەکری دەستکردیان تێدایە. ڕیشاڵەکان یارمەتی هێواشکردنەوەی هەڵمژینی شەکری سروشتی دەدەن.

پزیشکان ئامۆژگاری ئەوە دەکەن کە خواردنی میوەکە وەک خۆی باشترە لە خواردنەوەی شەربەتەکەی. میوەی تەواو ڕیشاڵە سروشتییەکانی تێدا دەمێنێتەوە، لە کاتێکدا شەربەتەکان زۆرجار شەکری چڕکراوەیان تێدایە و دەبنە هۆی بەرزبوونەوەی خێرای ئاستی شەکر. هەروەها بڕی خواردنی میوەکەش فاکتەرێکی گرنگە و نابێت زیادەڕۆیی تێدا بکرێت.

توێژینەوەکان دەریانخستووە کە ئەو پارێزە خۆراکییانەی دەوڵەمەندن بە میوە و سەوزە، مەترسی تووشبوون بە نەخۆشییەکانی دڵ کەم دەکەنەوە، کە ئەمەش یەکێکە لە نیگەرانییە باوەکان بۆ تووشبووانی شەکرە. وەڵامدانەوەی جەستەی هەر کەسێکیش دەکرێت جیاواز بێت، بۆیە ڕاوێژی پزیشکی تایبەت زۆر پێویستە.

پزیشکانی پسپۆڕی خۆراک جەخت دەکەنەوە کە هیچ میوەیەک بە تەنها چارەسەری شەکرە ناکات. لە جیاتی ئەوە، پەیڕەوکردنی شێوازێکی تەندروست لە خواردن، وەرزشی بەردەوام، بەکارهێنانی دەرمان لە کاتی پێویست و چاودێری پزیشکی، بنەما سەرەکییەکانی کۆنتڕۆڵکردنی شەکرەن.

پسپۆڕان بەردەوام هانی تووشبووانی شەکرە دەدەن کە جۆرە جیاوازەکانی میوەی پڕ لە ماددەی خۆراکی بەکاربهێنن وەک بەشێک لە ژەمە هاوسەنگەکانیان، چونکە بژاردەی خۆراکی تەندروست ڕۆڵێکی گەورە لە باشتربوونی تەندروستی درێژخایەندا دەگێڕێت.

سەرچاوە: کۆمەڵەی شەکرەی ئەمریکی؛ ڕێکخراوی تەندروستی جیهانی؛ زانکۆی هارڤارد.

PM:10:55:12/07/2026

ئه‌م بابه‌ته 48 جار خوێنراوه‌ته‌وه‌‌