دژە خۆر؛ پارێزەرێکی پێویست یان زیانێکی شاراوە؟

وێستگە ستایل - سۆلین عوسمان

بەکارهێنانی دژە خۆر یەکێکە لە ئامۆژگارییە سەرەکییەکانی پزیشکانی پێست، بەڵام وەک هەر بەرهەمێکی تری کیمیایی، ئەمیش لایەنی ئەرێنی و نەرێنی خۆی هەیە کە پێویستە بەکارهێنەران لێی ئاگادار بن.

سودە سەرەکییەکانی دژە خۆر بریتین لە پاراستنی پێست لە تیشکی سەروو وەنەوشەیی (UV) کە دەبێتە هۆی سووتانی پێست، پیربوونی پێشوەختە و دروستبوونی پەڵە، هەروەها گرنگترین سودی ئەوەیە کە ئەگەری تووشبوون بە شێرپەنجەی پێست بە ڕێژەیەکی بەرچاو کەمدەکاتەوە.

لە لایەکی ترەوە، هەندێک زیانی هەیە وەک ئەوەی کە هەندێک جۆری دژە خۆر دەبنە هۆی داخستنی کونیەلەکانی پێست و دروستبوونی زیپکە، هەروەها هەندێک لێکۆڵینەوە ئاماژە بەوە دەکەن کە بەکارهێنانی بەردەوامی دژە خۆر دەبێتە هۆی کەمبوونەوەی ڤیتامین D لە جەستەدا، چونکە ڕێگری لە پێست دەکات تیشکی خۆر وەربگرێت بۆ دروستکردنی ئەو ڤیتامینە.

پێویستە دژە خۆرێک هەڵبژێریت کە SPFەکەی لە ٣٠ کەمتر نەبێت و لەگەڵ جۆری پێستت بگونجێت، ئەگەر پێستت هەستیارە، باشتر وایە دژە خۆری فیزیکی (Physical) بەکاربهێنیت کە ماددەی زینک و تیتانیۆمی تێدایە و کەمتر دەبێتە هۆی هەستیاری.

دژە خۆر بەشێکی دانەبڕاوە لە ڕۆتینی ڕۆژانە، بەڵام باشتر وایە دوای گەڕانەوە بۆ ماڵەوە پێست بەباشی پاک بکرێتەوە بۆ ئەوەی پاشماوە کیمیاییەکان زیان بە پێست نەگەیەنن.

سەرچاوە: ئەکادیمیای ئەمریکی بۆ نەخۆشییەکانی پێست AAD

PM:10:06:30/06/2026

ئه‌م بابه‌ته 160 جار خوێنراوه‌ته‌وه‌‌