شۆڕشێکی نوێ لە جیهانی پزیشکیدا؛ تاقیکردنەوەی سەرکەوتووی کوتانی دژ بە شێرپەنجە

وێستگە ستایل - سۆلین عوسمان

زانا بەریتانییەکان لە پەرەسەندنێکی مێژووییدا سەرکەوتنی یەکەمین کوتانی تایبەت بە چارەسەری جۆرەها شێرپەنجەیان ڕاگەیاند کە لەسەر نەخۆشەکان تاقیکراوەتەوە.

ئەم دەستکەوتە پزیشکییە نوێیە هیوایەکی گەورە بۆ ملیۆنان مرۆڤ لە سەرانسەری جیهاندا دەگەڕێنێتەوە، دوای ئەوەی تاقیکردنەوە سەرەتاییەکان نیشانیاندا کە ئەم کوتانە دەبێتە هۆی چالاککردنی سیستمی بەرگری لەش بۆ لەناوبردنی خانە شێرپەنجەییەکان بەبێ زیانگەیاندن بە خانە ساغەکان.

پزیشکان لە پەیمانگای توێژینەوەی شێرپەنجە لە لەندەن ئاشکرایان کردووە کە کوتانەکە بە شێوازێکی پێشکەوتوو لەسەر بنەمای تەکنەلۆژیای (mRNA) دروستکراوە، هاوشێوەی ئەو تەکنەلۆژیایەی لە کوتانی کۆرۆنادا بەکارهات، بەڵام ئەمجارەیان بۆ ڕێگریکردن لە گەشەکردن و گەڕانەوەی گرێ شێرپەنجەییەکان پەرەی پێدراوە. نەخۆشەکان دوای وەرگرتنی ژەمەکان هیچ نیشانەیەکی توندی لاوەکییان لەرێگەی تاقیکردنەوە کلینیکییەکانەوە تێدا دەرنەکەوتووە.

بۆ ماوەی چەندین دەیە، چارەسەری کیمیایی و تیشکی تەنها ڕێگەی سەرەکی بوون بۆ ڕووبەڕووبوونەوەی ئەم نەخۆشییە کوژەرە، بەڵام هەمیشە کاریگەری خراپیان لەسەر جەستەی مرۆڤ بەجێدەهێشت. ئەم وەرچەرخانە نوێیە لە ساڵی ٢٠٢٦دا وەک گەورەترین بازدانی پزیشکی سەدە سەیر دەکرێت.

شارەزایان پێشبینی دەکەن کە لە ماوەی سێ ساڵی داهاتوودا ئەم کوتانە بە شێوەیەکی فەرمی بچێتە بازاڕەکانی جیهانەوە و ببێتە هۆی کەمکردنەوەی ڕێژەی مردن بە شێرپەنجە بە ڕێژەی ٪٥٠.

گۆڤاری پزیشکی "The Lancet"

PM:11:47:22/06/2026

ئه‌م بابه‌ته 104 جار خوێنراوه‌ته‌وه‌‌