ئایا مرۆڤ دەتوانێت لەسەر ڤینۆس بژی؟ دۆزەخە گەرمەکەی کۆمەڵەی خۆر

وێستگە ستایل - سۆلین عوسمان

ڤینۆس یان زوهرە، کە زۆرجار بە "دووانەکەی زەوی" ناودەبرێت بەهۆی هاوشێوەیی

قەبارەکەیان، لە ڕاستیدا یەکێکە لە مەترسیدارترین شوێنەکانی گەردوون بۆ

مرۆڤ. سەرەڕای نزیکییەکەی، ژیان لەسەر ئەم هەسارەیە وەک خەونێکی مەحاڵ دەبینرێت

بەهۆی بارودۆخە جەهەنەمییەکەیەوە.

پلەی گەرمی لەسەر ڕووی ڤینۆس دەگاتە ٤٦٠ پلەی سیلیزی، کە ئەوەندە گەرمە دەتوانێت

ڕێژە (قورقوشم) بتوێنێتەوە. ئەمە جگە لەوەی بەرگەهەواکەی لە سەدا ٩٦ی کاربۆن

دایۆکسایدە، کە دیاردەی قەتیسبوونی گەرمی دروستکردووە. هەروەها پەستانی هەوا

لەوێ ٩٠ جار لە زەوی زیاترە، واتە مرۆڤ لەوێ وەک ئەوە وایە کیلۆمەترێک لە ژێر

ئاو بێت، دەستبەجێ پان دەبێتەوە.

لە ئاسمانی ڤینۆسەوە بارانی ئەسیدی (سلفوریک ئەسید) دەبارێت، کە هەر شتێک بەرکەوێت

دەیسوتێنێت. هەرچەندە زانایان باس لەوە دەکەن کە لە بەرزایی ٥٠ کیلۆمەتر لە

ئاسمانی ڤینۆسدا پلەی گەرمی و پەستان گونجاوترە، بەڵام هێشتا هیچ

تەکنەلۆژیایەک نییە بتوانێت شارێکی هەڵواسراو لەوێ دروست بکات.

ڤینۆس لە ڕابردوودا ڕەنگە هاوشێوەی زەوی بووبێت و ئاوی لێ بووبێت، بەڵام بەهۆی

گۆڕانکارییەکی گەورەی ژینگەییەوە بووەتە ئەم دۆزەخەی ئێستا. لێکۆڵینەوە لە

ڤینۆس بۆ زانایان گرنگە تا بزانن چۆن زەوی بپارێزن لەوەی تووشی هەمان چارەنووس

نەبێت.

لە ئێستادا، ژیان لەسەر ڤینۆس مەحاڵە و تەنانەت ڕۆبۆتەکانیش ناتوانن لە چەند

کاتژمێرێک زیاتر لەوێ بمێننەوە و تێکدەچن. خەونی مرۆڤ بۆ نیشتەجێبوون لە

هەسارەکانی تر، زیاتر بەرەو مەریخ دەچێت چونکە بارودۆخی زۆر گونجاوترە.

سەرچاوە: ئاژانسی ناسا (NASA)

PM:11:54:07/05/2026

ئه‌م بابه‌ته 56 جار خوێنراوه‌ته‌وه‌‌