ئاسمانگەڕەکان لە گەشتی مەریخدا پاشماوەی خۆیان دەخۆنەوە

وێستگە ستایل - سۆلین عوسمان

ئاژانسی بۆشایی ئاسمانی ناسا سیستەمێکی نوێی خواردنی ئاشکرا کرد کە تایبەتە بە گەشتە دوورەکانی مەریخ. ئەم سیستەمە لە جیاتی بردنی خواردنی ئامادەکراو، "پاشماوەی" ئاسمانگەڕەکان و تەنانەت ئامێرە پلاستیکییە شکاوەکان بەکار دەهێنێت بۆ بەرهەمهێنانی قارچک و سەوزەی تازە لە ناو کەشتییەکەدا.

ئەم پڕۆسەیە لە ڕێگەی جۆرە قارچکێکی تایبەتەوە ئەنجام دەدرێت کە توانای هەیە پاشماوە ئۆرگانییەکان شیبکاتەوە و بیگۆڕێت بۆ خۆراکێکی پڕ لە پرۆتین. ئەمە وادەکات ئاسمانگەڕەکان لە ناو کەشتییەکەدا خاوەن "کێڵگەیەکی بچوکی هەمیشەیی" بن و پێویستیان بەوە نەبێت بڕێکی زۆر خواردن لەگەڵ خۆیان ببەن کە تێچوویەکی خەیاڵی دەوێت.

جگە لە قارچک، ئاسمانگەڕەکان دەتوانن سەوزەی تازەش بخۆن کە بەهۆی ئەم سیستەمە ژینگەییە داخراوەوە گەشە دەکەن. ئەمە نەک تەنیا بۆ جەستەیان باشە، بەڵکو لە ڕووی دەروونییەوە یارمەتیدەرە کە لە ناو بۆشایی ئاسماندا تامی خواردنی تازە بکەن.

ناسا دەڵێت گەورەترین تەحەدا لەم پڕۆژەیەدا لایەنی دەروونییە، چونکە زۆرێک لە مرۆڤەکان حەز ناکەن ئەو خواردنە بخۆن کە دەزانن لە پاشماوەی خۆیان دروست بووە. بۆیە شارەزایانی چێشتلێنان کار لەسەر ئەوە دەکەن کە تام و بۆنێکی زۆر خۆش بدەن بەو خواردنانە تاوەکو ئاسمانگەڕەکان بە ئاسانی قبوڵی بکەن.

ئەم تاقیکردنەوەیە بڕیارە لە گەشتی داهاتووی "Gateway" بۆ دەوری مانگ تاقی بکرێتەوە و ئەگەر سەرکەوتوو بێت، دەبێتە مۆدێلێکی جیهانی بۆ بەرهەمهێنانی خۆراکی بەردەوام لەسەر زەویش، بەتایبەت لەو شوێنانەی کە ئاوی تێدا نییە.

سەرچاوە: تاقیگەی تەکنەلۆژیای خواردنی ناسا و زانکۆی MIT.

PM:05:18:01/03/2026

ئه‌م بابه‌ته 84 جار خوێنراوه‌ته‌وه‌‌