ناسا ٦ی ئازار وەک ززوترین کات بۆ ناردنی کەشتیوانان بۆ دەوری مانگ دیاریکرد

وێستگە ستایل - سۆلین عوسمان

ئاژانسی بۆشایی ئاسمانی ئەمریکا (ناسا) بە فەرمی ڕایگەیاند کە ڕۆژی ٦ی ئازاری ساڵی ٢٠٢٦ وەک زووترین کات بۆ دەسپێکردنی ئەرکی مێژوویی "ئارتیمیس ٢" دیاریکراوە. ئەم گەشتە ئامانجیەتی چوار کەشتیوان کە سێیان ئەمریکی و یەکێکیان کەنەدییە، بۆ یەکەمجار لە دوای زیاتر لە پەنجا ساڵ بنێرێتە قووڵایی بۆشایی ئاسمان و سوڕانەوە بە دەوری مانگدا.

ئەم بڕیارە دوای ئەوە هات کە ناسا سەرکەوتووانە تاقیکردنەوەیەکی زەمینی گرنگی ئەنجامدا بۆ چارەسەرکردنی ئەو کێشە تەکنیکییانەی کە پێشتر ئاستەنگیان بۆ ئامادەکارییەکان دروست کردبوو. ئەم هەنگاوە ئاماژەیەکی ڕوونە بۆ ئەوەی ئاژانسەکە ئامادەیە بۆ گرتنەبەری هەنگاوە گەورەکەی داهاتوو لە گەڕان بەدوای مانگدا.

بڕیارەکە دوای تەواوبوونی دووەم "مەشق و ڕاهێنانی تەڕ" لە بنکەی ئاسمانی کیپ کەنارێڤاڵ لە فلۆریدا هات، کە تێیدا هەموو پرۆسەکانی پێش هەڵدان بەبێ داگیرساندنی بزوێنەرەکان ئەنجامدرا. جارید ئایزاکمان، بەڕێوەبەری ناسا، ئەم تاقیکردنەوەیەی وەک "هەنگاوێکی گەورە بەرەو گەڕانەوەی ئەمریکا بۆ ژینگەی مانگ" وەسف کرد. هەروەها لۆری گڵەیز، بەڕێوەبەری ناسا، جەختی لەوە کردەوە کە ئەو چاکسازییانەی بۆ دزەکردنی هایدرۆجین کرابوون، کاریگەر بوون و زۆربەی ڕێکارەکان بەپێی پلانەکە بەڕێوەچوون.

تیمی کەشتیوانەکان کە پێکهاتوون لە کریستینا کۆچ، ڤیکتۆر گڵۆڤەر، ڕید وایزمان و جێرمی هانسن، ئێستا خۆیان بۆ کەرەنتینەی پێش هەڵدان ئامادە دەکەن. گەشتەکە نزیکەی دە ڕۆژ دەخایەنێت و تێیدا کەشتی ئاسمانی ئۆریۆن سیستەمەکانی ژیان، ڕێدۆزی و پەیوەندییەکان لە بۆشایی قووڵدا تاقی دەکاتەوە. ئەمە پێشەکییەکە بۆ ئەرکی "ئارتیمیس ٣" کە ئامانجی ناردنی یەکەم ژن و پیاوی داهاتووە بۆ سەر ڕووی مانگ.

ئاژانسەکە دوای تێپەڕاندنی ئاستەنگەکانی سیستەمی سووتەمەنی و گۆڕینی فلتەرەکان، ئێستا بە گەشبینییەکی وریایانەوە دەڕوانێتە دەسپێکی چەرخێکی نوێی مانگ کە چاوەڕوان دەکرێت ببێتە بنکەیەک بۆ مانەوەی بەردەوامی مرۆڤ لەوێ.

سەرچاوە: ماڵپەڕی فەرمی ناسا (NASA)، ئاژانسی هەواڵی ڕۆیتەرز.

PM:09:20:22/02/2026

ئه‌م بابه‌ته 24 جار خوێنراوه‌ته‌وه‌‌