زریانی بۆیلۆ هۆشداریی باوبۆڕانی توند و بارانی بەخوڕ لە بەریتانیا دروست دەکات

وێستگە ستایل - سۆلین عوسمان

دەستەی کەشناسیی بەریتانیا لە ٢٤ی تشرینی یەکەم هۆشداریدا کە زریانی بۆیلۆ لە کۆتایی هەفتەدا دەبێتە هۆی دروستبوونی رەشەبای بەهێز و بارانبارینی بەخوڕ لە چەندین ناوچەی جیاوازی وڵاتەکەدا.

بەپێی پێشبینییەکان، زریانەکە لە باکووری ڕۆژئاوای وڵاتەوە نزیک دەبێتەوە و کاریگەریی زیاتری لەسەر سکۆتلەندا و بەشێک لە ئێرلەندای باکوور و باکووری ئینگلتەرا دەبێت، خێرایی با لە زۆربەی شوێنەکان دەگاتە ٦٠ بۆ ٧٠ میل لە کاتژمێرێکدا و لە ناوچە کەناراوییەکانیش ڕەنگە بگاتە ٨٠ میل.

ئەم کەشوهەوایە بارانبارینێکی زۆری لەگەڵ دەبێت کە بە تایبەت کاریگەری لەسەر ناوچە شاخاوییەکان دادەنێت، دەسەڵاتدارانیش هۆشداری دەدەن کە تێکەڵبوونی با و باران ئاستەنگی زۆر بۆ هاتوچۆ و چالاکییەکانی دەرەوە دروست دەکات.

زریانی بۆیلۆ ڕاستەوخۆ دوای زریانی ئۆستن دێت، کە پێشتر کەشوهەوایەکی توندی لە بەریتانیا دروستکردبوو پێش ئەوەی بەرەو ئەوروپا بڕوات، ئەمەش گرنگیی چاودێریکردنی پێشبینییە فەرمییەکانی کەشوهەوای زیاتر کردووە.

کەشوهەوای توند دەتوانێت گەشتە ئاسمانییەکان و هێڵەکانی شەمەندەفەر پەکبخات و زیان بە درەخت و باڵەخانەکان بگەیەنێت، بۆیە داوا لە هاووڵاتییان دەکرێت ڕێنماییە فەرمییەکان جێبەجێ بکەن و لە کەناراوە مەترسیدارەکان دوور بکەونەوە.

دەستەی کەشناسیی بەریتانیا بەردەوام دەبێت لە بڵاوکردنەوەی زانیاری و هۆشداریی نوێ بۆ ئەوەی خەڵک و دەسەڵاتە ناوخۆییەکان ئامادەکاریی پێویست بۆ بەرەنگاربوونەوەی ئەم زریانە بکەن.

دەستەی کەشناسیی بەریتانیا (UK Met Office)

PM:11:30:24/10/2026

ئه‌م بابه‌ته 160 جار خوێنراوه‌ته‌وه‌‌