سلێمانی دەبێتە میوانداری کۆنسێرتێکی میوزیکی ناوازە

وێستگە ستایل - سۆلین عوسمان

لە درێژەی کارە هونەرییەکانیدا، دامەزراوەی چەتری کولتووریی سلێمانی بە هەماهەنگی لەگەڵ ئۆرکێسترای سیمفۆنیی سلێمانی، کۆنسێرتێکی میوزیکی گەورە و ناوازە بۆ هەوادارانی هونەر ئەنجام دەدات.

ئەم چالاکییە هونەرییە لەژێر ڕابەرایەتیی هونەرمەند (عەبدوڵا جەمال سەگرمە) بەڕێوەدەچێت، کە یەکێکە لە ناوە دیارەکانی بواری میوزیک و سیمفۆنی لە کوردستاندا.

کۆنسێرتەکە بۆ ماوەی دوو ڕۆژ، لە ڕێکەوتەکانی ٥ و ٦ی ئەیلوولی ٢٠٢٦، لە کاتژمێر٦:٠٠ی ئێوارە لە هۆڵی کۆنگرێس لە کەمپی نوێی زانکۆی سلێمانی پێشکەش دەکرێت.

ئەم هەنگاوەی دامەزراوەی چەتری کولتووری و ئۆرکێسترای سیمفۆنیی سلێمانی، لە چوارچێوەی هەوڵە بەردەوامەکانە بۆ گەشەپێدانی کلتووری میوزیک و ڕەخساندنی ژینگەیەکی هونەریی شایستە بۆ شاری سلێمانی.

کۆنسێرتەکە دەرفەتێکی گرنگ دەبێت بۆ کۆکردنەوەی ژەنیارە بەتواناکان و پێشکەشکردنی تابلۆیەکی میوزیکی کە ئاستی بەرزی هونەریی ئۆرکێسترا و دامەزراوەکە نیشان بدات.

سەرچاوە: ڕاگەیەندراوی دامەزراوەی چەتری کولتووریی سلێمانی.