کاروان عوسمان؛ ئەو ھونەرمەندەی لە زینداندا دواین ئاوازەکانی بۆ نیشتمان چڕی

وێستگە ستایل - سۆلین عوسمان

کاروان عوسمان تۆفیق، ناسراو بە کاروان عوسمان، یەکێک بوو لە دەنگە جیاواز و شۆڕشگێڕەکانی شاری سلێمانی کە لە تەمەنێکی کورتدا و لە لوتکەی داهێناندا، لە لایەن ڕژێمی بەعسەوە کۆتایی بە ژیانی هێنرا. ئەو تەنها گۆرانیبێژ نەبوو، بەڵکو مۆسیقاژەنێکی کارامە بوو کە توانی بە ئامێری گیتار و دەنگە پڕ لە سۆزەکەی، چیرۆکی نادادی و ئازارەکانی کۆمەڵگەکەی بگێڕێتەوە.

کاروان لە ١ی تەممووزی ١٩٦٨ لە گەڕەکی ئیبراھیم پاشای سلێمانی لەدایکبوو. سەرەتای ئاشنابوونی بە جیهانی مۆسیقا بۆ ساڵی ١٩٨١ دەگەڕێتەوە، کاتێک لە تەمەنی ١٣ ساڵیدا لەسەر دەستی مامۆستا ولیەم یوحەننا دەستی بە فێربوونی کەمانچە کرد. دواتر بەهرەکەی لە ئامێری عووددا دەرکەوت و لە ساڵی ١٩٨٨ توانی پلەی یەکەم لەسەر ئاستی عێراق بەدەستبهێنێت، بەڵام دواجار گیتار بوو بە هاوڕێی نزیکی و زۆربەی بەرهەمە نەممرەکانی پێ تۆمار کرد.

ژیانی هونەری کاروان پڕ بوو لە وەرچەرخان و داهێنان. لە ساڵی ١٩٨٧ بە گۆرانی "ئاھێک" کە ئاوازی ماملێ و هۆنراوەی سیروان حەمە ڕەشید بوو، خۆی بە جەماوەر ناساند. کارە هاوبەشەکانی لەگەڵ کەمال محەممەد و حەمید بانەیی، ڕەهەندێکی نوێیان بە گۆرانی پکوردی بەخشی. یەکێک لە کارە هەرە جیاواز و بوێرەکانی، وەرگێڕانی گۆرانی "Imagine"ی جۆن لێنۆن بوو بۆ سەر زمانی کوردی بە ناوی "بێنە پێش چاو"، کە بەهۆی ناوەرۆکە مرۆڤدۆستانە و شۆڕشگێڕییەکەیەوە لەلایەن ڕژێمەوە سانسۆر کرا.

مەرگی ئەم هونەرمەندە بە یەکێک لە تراژیدیاکانی مێژووی هونەری کوردی دادەنرێت. لە ١٢ی کانوونی دووەمی ١٩٨٩، بە تۆمەتێکی هەڵبەستراو دەستگیر دەکرێت و لە زینداندا ڕووبەڕووی توندترین ئەشکەنجە دەبێتەوە. کاروان تەنانەت لە ناو زیندانیشدا دەستبەرداری هونەرەکەی نەبوو و توانی دوو کاسێت تۆمار بکات. سێ ڕۆژ پێش لەسێدارەدانی، دەستنووسێکی بە ناوی "پاڵتۆ" بۆ هاوڕێی شاعیری "محەممەد عومەر عوسمان" نارد وەک بەشێک لە پڕۆژە بڵاونەکراوەکەی بە ناوی "گیتارێکی پرچ سپی".

دواجار لە ٢٩ی ئەیلوولی ١٩٩١، کاروان عوسمان لە زیندانی ئەبوو غرێبی بەغدا لە سێدارە درا و تەرمەکەی لە گردی سەیوان لە سلێمانی بە خاک سپێردرا. ئەو هونەرمەندەی کە کاریگەری زۆری لەسەر بوو بە دەنگی داریووش و هونەرمەندە گەورەکانی کورد، بوو بە سیمبولی هونەرمەندێکی چەوساوە کە تا دوا هەناسە ئامادە نەبوو دەستبەرداری پەیامە نیشتمانی و مرۆییەکانی ببێت و بە گیتارەکەیەوە مێژوویەکی پڕ لە شکۆیی بۆ خۆی تۆمار

کرد.

سەرچاوەکان: ١. بەڵگەفیلمی گیتارێکی تەنھا (٢٠١٠). ٢. ئەرشیفی ماڵپەڕی ئەمڕۆ و پەیامی کامەران عوسمانی برای. ٣. گۆڤاری پەیک و ماڵپەڕی دنکەکان. ٤. دیسکۆگرافیا و تۆمارە دەنگییەکانی هونەرمەند (١٩٨٧-٢٠١١).

PM:06:10:21/08/2026

ئه‌م بابه‌ته 72 جار خوێنراوه‌ته‌وه‌‌