حەمە هاشم بە "ڕووخسارەکانی دوای جەنگ"ەوە دەگاتە ڕۆمانیا و پەیامی مرۆیی کورد دەگەیەنێتە ناو جەرگەی ئەوروپا

وێستگە ستایل - سۆلین عوسمان

هونەرمەند و شێوەکاری ناوداری کورد، حەمە هاشم، لە نوێترین هەنگاوی هونەریی خۆیدا بەرەو ناوەندە هونەرییەکانی ئەوروپا هەنگاو دەنێت و ئامادەکارییەکانی تەواو کردووە بۆ کردنەوەی پێشانگەیەکی تایبەت لە وڵاتی ڕۆمانیا. ئەم چالاکییە هونەرییە دوای وەرگرتنی بانگهێشتنامەیەکی فەرمی دێت، کە تێیدا هونەرمەند وەک نوێنەرێکی شێوەکاریی کوردی، بەرهەمە نوێیەکانی خۆی لە یەکێک لە شارە گرنگەکانی ئەو وڵاتە نمایش دەکات و بڕیارە ئامادەبوونی بەرچاوی پهونەردۆستان و ڕەخنەگرانی شێوەکاری بەخۆیەوە ببینێت.

ئەم پێشانگە نوێیەی حەمە هاشم، بە ناونیشانی "ڕووخسارەکانی دوای جەنگ" لە ڕێکەوتی 27ی حوزەیرانی ئەمساڵ لە وڵاتی ڕۆمانیا دەکرێتەوە. چالاکییەکە بە شێوەیەکی فەرمی و لەژێر سەرپەرشتیی ڕاستەوخۆی ئەنجوومەنی شارەوانیی ئۆرادیا بەڕێوەدەچێت. هۆکاری سەرەکیی ڕێکخستنی ئە پێشانگەیە بۆ ئەو بانگهێشتنامە فەرمییە دەگەڕێتەوە کە لەلایەن "یەکێتیی هونەرمەندانی شێوەکاریی ڕۆمانیا"وە ئاراستەی ئەم هونەرمەندە کراوە، ئەمەش نیشانەی بایەخی ناوەندە هونەرییەکانی ئەوروپایە بە ئەزموون و دیدگا هونەرییەکانی حەمە هاشم کە ساڵانێکی درێژە لە بواری شێوەکاریدا کار دەکات.

لە ڕووی ناوەڕۆک و ژمارەی کارەکانەوە، حەمە هاشم بە نزیکەی 50 تابلۆی نوێوە بەشداری دەکات. تابلۆکان هەڵگری پەیامێکی مرۆیی و گەردوونی قووڵن، کە تێیدا هونەرمەند تیشک دەخاتە سەر کاریگەرییە وێرانکەرەکانی جەنگ و ململانێ چەکدارییەکان لەسەر ڕووخسار و دەروونی مرۆڤەکان. ئەم بەرهەمانە تەنها گوزارشت لە ئازارەکانی ناوخۆی کوردستان ناکەن، بەڵکو وەک زمانێکی جیهانی، وێرانکارییەکانی جەنگ لەسەر ئاستی تەواوی مرۆڤایەتی لە قاڵبێکی هونەریی مودێرندا بەرجەستە دەکەن، ئەمەش وای کردووە پێشانگەکە ببێتە جێی سەرنجی ناوەندە فەرمییەکانی ڕۆمانیا.

حەمە هاشم تەنها وەک شێوەکارێک لە کایەکەدا دەرنەکەوتووە، بەڵکو یەکێکە لەو ناوە دەگمەنانەی کە خاوەنی پاشخانێکی تیۆری و مەعریفیی دەوڵەمەندە لە بواری هونەردا. ناوبراو لە ڕابردوودا خزمەتێکی زۆری بە کتێبخانەی کوردی کردووە و خاوەنی 10 کتێبی چاپکراوە کە تێیاندا بە وردی باسی لە مێژووی هونەر، مێتۆدە جیاوازەکانی شێوەکاری و قۆناغە مێژووییەکانی هونەری کردووە. ئەم ئەزموونە نووسین و توێژینەوەیەی، وای کردووە کارە هونەرییەکانی خاوەن ڕەهەندێکی فەلسەفی و مێژوویی بن و لە چەندین پێشانگەی پێشووتریدا لە ناوخۆ و دەرەوەی وڵات، جێدەستی خۆی بەسەر بزووتنەوەی لشێوەکارییەوە جێهێشتووە.

کردنەوەی ئەم پێشانگەیە لە ڕۆمانیا، وەک دەستکەوتێکی دیکە بۆ هونەری شێوەکاریی کوردی ئەژمار دەکرێت، کە تێیدا هونەرمەندێکی کورد دەتوانێت لەڕێگەی ڕەنگ و فڵچەوە، دەنگی قوربانیانی جەنگ و شوێنەوارە دەروونییەکانی ململانێکان بە گوێیجیهاندا بچرپێنێت. چاوەڕوان دەکرێت پێشانگەی " ڕووخسارەکانی دوای جەنگ" ببێتە یەکێک لە وێستگە هەرە دیارەکانی ژیانی هونەریی حەمە هاشم و دەنگدانەوەیەکی باشی لە میدیاکانی ئەو وڵاتەدا هەبێت و وەک پردێکی کولتووری لەنێوان کوردستان و ڕۆمانیا کار بکات.

PM:07:37:20/06/2026

ئه‌م بابه‌ته 64 جار خوێنراوه‌ته‌وه‌‌