ئێران مۆڵ؛ گەورەترین ناوەندی بازرگانی و گەشتیاری لەسەر ئاستی جیهان

وێستگە ستایل - سۆلین عوسمان

کاتێک باس لە گەورەترین مۆڵی جیهان دەکرێت، ڕەنگە زۆرێک بیر لە دوبەی یان ئەمریکا

بکەنەوە، بەڵام لە ڕاستیدا "ئێران مۆڵ" (Iran Mall) کە لە ڕۆژئاوای تاران

هەڵکەوتووە، لە ئێستادا بە گەورەترین مۆڵی جیهان دادەنرێت لە ڕووی ڕووبەری

گشتییەوە.

ئەم پرۆژە زەبەلاحە تەنها ناوەندێکی کڕین و فرۆشتن نییە، بەڵکو شارێکی تەواوە کە

ڕووبەرەکەی دەگاتە زیاتر لە یەک ملیۆن و ٦٠٠ هەزار مەتر دووجا. تێیدا تێکەڵەیەک

لە تەلارسازی مۆدێرن و کلاسیکی ئێرانی دەبینرێت، کە چەندین بەشی جیاوازی وەک

کتێبخانە، باخچەی ناوخۆیی، و هۆڵی وەرزشی لەخۆ دەگرێت.

لە ناو "ئێران مۆڵ"دا یەکێک لە جوانترین کتێبخانەکانی جیهان هەیە کە بە شێوازێکی

مێژوویی دروستکراوە، هەروەها بازاڕێکی سونەتی تێدایە کە هاوشێوەی بازاڕە

کۆنەکانی تەورێز و ئەسفەهانە. جگە لە سەدان فرۆشگای مارکە جیهانییەکان،

مۆڵەکە خاوەنی هۆتێلی پێنج ئەستێرە، سینەما، و پیستی سەهۆڵانیشە.

کارکردن لەم پڕۆژەیەدا چەندین ساڵی خایاندووە و ئامانج لێی دروستکردنی ناوەندێکی

گەشتیاری و ئابووری بووە کە بتوانێت ساڵانە ملیۆنان گەشتیار ڕابکێشێت. ئەم مۆڵە

وەک نیشانەیەکی گەشەسەندنی تەلارسازی و ئابووری لە ناوچەکەدا دەبینرێت.

ئێران مۆڵ تەنها بۆ بازاڕکردن نییە، بەڵکو بووەتە شوێنێکی ڕۆشنبیری کە تێیدا

پێشانگای هونەری و فێستیڤاڵە جۆراوجۆرەکان ئەنجام دەدرێن، ئەمەش وای کردووە

ببێتە جێگەی سەرنجی میدیا جیهانییەکان.

سەرچاوە: تۆماری جیهانی گینس (Guinness World Records) و ماڵپەڕی فەرمی "Iran

Mall".

PM:11:51:29/05/2026

ئه‌م بابه‌ته 16 جار خوێنراوه‌ته‌وه‌‌