لۆنی ویلسۆن.. لە لوتکەی جوانیی و ناوبانگەوە بۆ وێرانبوون و ژیان لەسەر شەقامەکان
وێستگە ستایل-
لۆنی ویلسۆن.. لە لوتکەی جوانیی و ناوبانگەوە بۆ وێرانبوون و ژیان لەسەر شەقامەکان
وێستگە ستایل - سۆلین عوسمان
لۆنی ویلسۆن، ئەو مۆدێلە شۆخ و دەستڕەنگینەی کە ڕۆژانێک وێنەکانی ڕووپەڕی گۆڤارە
جیهانییەکانیان دەڕازاندەوە، ئێستا بووەتە یەکێک لە خەمناکترین چیرۆکەکانی
تێکچوونی ژیانی ئەستێرەکان. ئەو ژنەی کە وەک هێمایەکی لەشجوانی و تەندروستی
دەبینرا، لە ئێستادا وەک بێلانەیەک لەسەر شەقامەکان دەردەکەوێت و شێوەی بە جۆرێک
گۆڕاوە کە ناسینەوەی ئەستەمە.
لە ساڵانی ٢٠٠٠دا، لۆنی یەکێک بوو لە دیارترین مۆدێلەکانی بواری لەشجوانی و
بەردەوام لەسەر بەرگی گۆڤارە ناودارەکان دەردەکەوت. ژیانێکی پڕ لە
بریقەوباق و سەرکەوتنی هەبوو، کە وای لێکردبوو ببێتە جێگەی سەرنجی
میدیاکان. لە ساڵی ٢٠١٢دا، ئەم ناوبانگەی گەیشتە لوتکە کاتێک هاوسەرگیری
لەگەڵ "جێرمی جاکسۆن"، ئەکتەری ناسراوی زنجیرەی "بای وۆچ" کرد، بەڵام ئەم
خۆشبەختییە زۆری نەخایاند.
دوای تەنها دوو ساڵ و لە ساڵی ٢٠١٤دا، پەیوەندییەکەیان بە جیابوونەوەیەکی پڕ لە
کێشە کۆتایی هات. ئەم جیابوونەوەیە تەنها کۆتایی ژیانی هاوسەری نەبوو، بەڵکو
بووە خاڵی وەرچەرخانێکی مەترسیدار لە ژیانی لۆنی-دا. دوای ئەوە، لۆنی بە
خێراییەکی سەرسوڕهێنەر بەرەو تارییکی هەنگاوی نا و بە تەواوی لە چاوی
کامێراکان ون بوو.
دوای چەند ساڵێک لە بێدەنگی، وێنەکانی لۆنی لەسەر شەقامەکانی کالیفۆرنیا
بڵاوبوونەوە کە تێیدا وەک کەسێکی بێلانە و وێرانبوو دەردەکەوێت. لۆنی
کەوتە داوی بەکارهێنانی ماددە هۆشبەرەکان و کێشە دەروونییەکانەوە، کە بوونە هۆی
ئەوەی هەموو سامان و جوانی و تەندروستییەکەی لەدەست بدات. ئێستا ئەو مۆدێلە شۆخەی
جاران، وەک کەسێکی زۆر نەخۆش و بێهێز دەردەکەوێت کە عارەبانەیەک پاشماوەی بۆ بژێوی
ژیانی بەدەستەوەیە.
چیرۆکی لۆنی ویلسۆن وەبیرهێنانەوەیەکی تاڵ و کاریگەرە بۆ هەمووان، کە چۆن ژیان
دەتوانێت لە ماوەیەکی کورتدا مرۆڤ لە لوتکەی سەرکەوتن و ناوبانگەوە بۆ ناو
قوڵایی ئازار و بێلانەیی ببات، و چۆن ماددە هۆشبەرەکان دەتوانن جوانترین و
بەهێزترین مرۆڤەکان وێران بکەن.
سەرچاوە: میدیا جیهانییەکان و رۆژنامەی دەیلی مەیڵ
PM:08:57:03/05/2026
ئهم بابهته 592
جار خوێنراوهتهوه