هەیفا وەهبی لە پشتگیریکردنەوە بۆ هۆڵەکانی دادگا؛ پزیشکێکی جوانکاری ڕاپێچی یاسا دەکرێت
وێستگە ستایل - سۆلین عوسمان
ئەستێرەی دیار و ناسراوی لوبنانی و جیهانی عەرەبی، هەیفا وەهبی، بڕیاری دا کۆتایی بە بێدەنگییەکەی بهێنێت و پەنا بۆ یاسا ببات. ئەمە دوای ئەوە دێت کە یەکێک لە سەنتەرە پزیشکییەکانی جوانکاری، ناوبانگ و وێنەکانی ئەم هونەرمەندەیان بۆ بەرژەوەندی بازرگانی و ڕیکلامی تایبەتی خۆیان بەکارهێناوە، بەبێ ئەوەی ڕەزامەندی فەرمی لێ وەربگرن، ئەمەش کاردانەوەی توندی هەیفای لێکەوتووەتەوە.
سەرەتای چیرۆکەکە بۆ سەردانێکی هەیفا وەهبی دەگەڕێتەوە بۆ سەنتەرێکی دیاریکراو، کە وەک خۆی لە ڕاگەیەندراوەکانیدا ئاماژەی پێداوە، تەنها بۆ پشتگیریکردن و لە ڕوانگەی مرۆیی و وەک چاکەیەک ئەو کارەی کردووە. هەیفا ویستوویەتی لە ڕێگەی ئامادەبوونی لەو شوێنە هاوکاری پزیشکەکە بکات بۆ بەرەوپێشچوونی کارەکانی، بەڵام پێشبینی نەکردووە ئەم نییەتە پاکەی وەک چەکێک دژی خۆی و بۆ بازاڕگەرییەکی بێبنەما و نایاسایی بەکاربهێنرێتەوە.
بەپێی زانیارییە بڵاوکراوەکان، خاوەن سەنتەرەکە چەندین وێنە و گرتەی ڤیدیۆیی هەیفایان لە پلاتفۆرمە جیاوازەکانی سۆشیاڵ میدیا بڵاوکردووەتەوە، بە مەبەستی ڕاکێشانی کڕیاری زیاتر و پیشاندانی ئەوەی کە ئەم ئەستێرەیە یەکێکە لە کڕیارە بەردەوامەکانیان. سەرەڕای ئەوەی هەیفا و تیمی یاساییەکەی چەندین جار ئاگادارییان داوەتە سەنتەرەکە بۆ سڕینەوەی ئەو وێنە و ڤیدیۆیانە، بەڵام پزیشکەکە بەبێ گوێدانە پرەنسیپە پیشەییەکان و مافی تایبەتمەندی کەسی، بەردەوام بووە لە بەکارهێنانیان، ئەمەش وای کردووە سکاڵای یاسایی لەسەر تۆمار بکرێت بە تۆمەتی "ئیستغلالکردنی ناوبانگ".
هەیفا وەهبی هەمیشە وەک ئایکۆنێکی جوانی و ستایل لە ڕۆژهەڵاتی ناوەڕاست ناسراوە، هەر بۆیە ناوبانگی ئەو بایەخێکی گەورەی بازرگانی هەیە و هەر کۆمپانیایەک بیەوێت وێنەی ئەو بەکاربهێنێت، دەبێت بڕە پارەیەکی خەیاڵی بدات. ئەمە یەکەمجار نییە کە ناو و وێنەی ئەم هونەرمەندە بۆ مەبەستی بازرگانیی نایاسایی بەکاردەهێنرێت، بەڵام ئەمجارەیان هەیفا سوورە لەسەر ئەوەی مافی خۆی بسەلمێنێت و ڕێگری بکات لە هەر جۆرە سوودوەرگرتنێکی ناڕەوا لە ناوی، بەو پێیەی ئەو جۆرە ڕەفتارانە بە پێشێلکردنی ئاشکرای ئاداب و یاساکانی کارکردنی پزیشکی دەبینێت.
لە ئێستادا دۆسیەکە لەبەردەم دادگایە و تیمی پارێزەرانی هەیفا سەرجەم بەڵگەکان و ئەو ڤیدیۆیانەیان کۆکردووەتەوە کە سەنتەرەکە بڵاوی کردوونەتەوە. ئەم هەنگاوەی هەیفا وەهبی پەیامێکی ڕوون و توندە بۆ هەموو ئەو لایەنە بازرگانییانەی کە ناوبانگی ئەستێرەکان بەکار دەهێنن بۆ مەرامی تایبەت، کە هیچ کارێکی لەو شێوەیە بەبێ گرێبەست و ڕەزامەندی فەرمی، ناتوانێت لە لێپرسینەوەی یاسایی و سزای توند دەربازی ببێت.
وەرگیراوە لە زاری نووسینگەی ڕاگەیاندنی هونەرمەند و لاپەڕە فەرمییەکانی لە تۆڕە کۆمەڵایەتییەکان.