ڕووسیا بەنیازە خەڵاتی "دۆستۆیەڤسکی" وەک جێگرەوەی خەڵاتی نۆبڵ دابهێنێت

وێستگە ستایل - سۆلین عوسمان

نووسەر و ڕۆشنبیرانی ڕووسیا خەریکی داڕشتنی پڕۆژەیەکی گەورەی ئەدەبین کە ئامانج لێی گۆڕینی هاوسەنگییەکانە لە جیهانی خەڵاتە نێودەوڵەتییەکاندا. یوری پۆلیاکۆڤ، نووسەری ناسراوی ڕووسی، بیرۆکەیەکی نوێی بۆ داهێنانی خەڵاتێکی ئەدەبی بە ناوی "دۆستۆیەڤسکی" پێشنیار کردووە.

پۆلیاکۆڤ پێی وایە کاتی ئەوە هاتووە جێگرەوەیەکی بەهێز بۆ خەڵاتی نۆبڵ بۆ ئەدەب هەبێت. ئەو دەڵێت فیۆدۆر دۆستۆیەڤسکی، وەک یەکێک لە مەزنترین و بەناوبانگترین ڕۆماننووسەکانی مێژووی مرۆڤایەتی، باشترین سیمبولە بۆ ئەوەی ناوی بنرێت بە خەڵاتێکی ئەدەبی نێودەوڵەتی کە کێبڕکێی خەڵاتە گەورەکانی جیهان بکات.

ئەم پێشنیارە تەنیا دەنگی پۆلیاکۆڤ نییە، بەڵکو چەندین کەسایەتی و نووسەری دیکەی ڕووسی هاوڕان لەسەری. پێشتر نووسەر زاخار پریلێپین لە کۆبوونەوەی ئەنجوومەنی سەرۆکایەتی ڕووسیا داوای کردبوو کە وڵاتەکەی کار بکات بۆ دوورکەوتنەوە لە ژێرکاریگەری خەڵاتە ڕۆژئاواییەکان و دروستکردنی ناوەندێکی نوێی خەڵاتکردن.

ئامانجی ئەم خەڵاتە تەنیا بۆ ڕووسیا نییە، بەڵکو هەوڵێکە بۆ کۆکردنەوەی نووسەرانی وڵاتانی وەک چین، هیندستان، وڵاتانی ئەفریقا و ئەمریکای لاتین لە ژێر چەتری خەڵاتێکی ئەدەبی کە بەها و کولتووری نەتەوەکانی تر لەبەرچاو بگرێت و تەنیا لە دیدگایەکی ڕۆژئاواییەوە سەیری ئەدەب نەکات.

داهێنانی خەڵاتی دۆستۆیەڤسکی وەک وەڵامێکی کولتووری دەبینرێت بۆ ئەو گۆشەگیرییەی کە ڕووسیا لە هەندێک ناوەندی نێودەوڵەتیدا هەستی پێدەکات، و دەیەوێت لە ڕێگەی ئەدەب و ناوی گەورە نووسەرەکانیەوە پێگەی خۆی لە جیهاندا بەهێزتر بکاتەوە.

ئەم بیرۆکەیە لە ناوەندە ئەدەبییەکاندا دەنگدانەوەی زۆری هەبووە و چاوەڕوان دەکرێت لە داهاتوویەکی نزیکدا هەنگاوی کردەیی بۆ بنرێت و مەرج و ڕێساکانی وەرگرتنی ئەم خەڵاتە نوێیە ڕابگەیەنرێت.

سەرچاوە: میدیا و ئاژانسە ئەدەبییەکانی ڕووسیا