موسا؛ پێغەمبەرێک لە کۆشک و ڕزگارکەرێک لە دەریادا

وێستگە ستایل - سۆلین عوسمان

ژیانی پێغەمبەر موسا (سڵاوی خوای لێبێت) یەکێکە لە پڕ کێشمەکێشترین و کاریگەرترین چیرۆکەکانی مێژووی مرۆڤایەتی، ئەو پیاوەی لە ناو جەرگەی دوژمنەکەیدا گەورە بوو و دواتر بوو بە گەورەترین هەڕەشە بۆ سەر تەختی فیرعەون، موسا تەنها ڕێبەرێکی ئایینی نەبوو، بەڵکو شۆڕشگێڕێک بوو کە گەلێکی لە ژێر ستەمی کۆیلایەتی دەرهێنا و بەرەو ئازادی بردن.

چیرۆکەکە لەو کاتەوە دەست پێدەکات کە دایکی موسا بۆ پاراستنی کوڕەکەی لە دەستی سەربازەکانی فیرعەون، دەیخاتە ناو سندوقێک و دەیسپێرێت بە ئاوی نیل، بە ڕێکەوت دەگاتە دەستی خێزانی فیرعەون و لە کۆشکی پاشادا وەک شازادەیەک گەورە دەبێت، بەڵام هەستی دادپەروەری و ناسنامەی ڕاستەقینەی خۆی، وای لێدەکات کە پشت لە هەموو خۆشییەکانی کۆشک بکات و ڕوو لە بیابان بکات بۆ گەڕان بەدوای حەقیقەتدا.

موسا لە کێوی تۆر لەگەڵ پەروەردگاریدا دەدوێت و ئەرکی پەیامبەری پێ دەسپێردرێت، ئەو بە تەنها و بە تەنها دارەدەستێکەوە دەگەڕێتەوە بۆ لای فیرعەون بۆ ئەوەی داوای ئازادی نەوەی ئیسرائیل بکات، ئەو ململانێیەی لە نێوان هێزی ماددی فیرعەون و هێزی مەعنەوی موسادا ڕوویدا، بە یەکێک لە گەورەترین موعجیزەکانی مێژوو کۆتایی هات، کاتێک دەریا بۆ موسا و شوێنکەوتووانی شەق بوو و فیرعەون و سوپاکەشی تێیدا نوقم بوون.

دوای ڕزگاربوونیان، موسا ئەرکێکی قورستر دەگرێتە ئەستۆ کە ئەویش پەروەردەکردنی گەلەکەی و پێدانی شەریعەت و یاساکانە لە "تەورات"دا، ئەو لە بیاباندا لەگەڵ سەختییەکان و سەرکەشییەکانی گەلەکەی جەنگا و هەمیشە وەک ڕابەرێکی دڵسۆز و پشوودرێژ مایەوە، ژیانی ئەو پڕ بوو لە وانەی خۆڕاگری، باوەڕ و ململانێ لە پێناو مافی چەوساوەکاندا.

موسا وەک پێغەمبەرێکی گەورە لە هەر سێ ئایینە ئاسمانییەکەدا جێگەی ڕێزێکی بێپایانە، چیرۆکی ژیانی ئەو بۆ هەموو سەردەمەکان وانەیە، کە چۆن مرۆڤ دەتوانێت بە باوەڕێکی پتەوەوە بەرەوڕووی گەورەترین ستەمکارانی سەردەم بێتەوە، ئەو کۆچی دوایی کرد بەبێ ئەوەی بچێتە خاکی پیرۆز، بەڵام ناوەکەی بۆ هەمیشە وەک ڕزگارکەرێکی مەزن لە مێژوودا تۆمار کرا.

سەرچاوە: کتێبە ئاسمانییەکان (تەورات، ئینجیل و قورئان) و گێڕانەوە مێژووییەکان.