ڕێڕەوێکی مێژوویی شەمەندەفەری ژێرزەوی لە نیویۆرک ڕووبەڕووی مەترسی لەناوچوون دەبێتەوە

وێستگە ستایل - سۆلین عوسمان

دۆزینەوەی ڕێڕەوێکی نهێنی مێژوویی لە ژێر مۆزەخانەی "مێرچەنت هاوس" لە ناوچەی مانهاتنی شاری نیویۆرک، مشتومڕێکی گەورەی لەنێوان پارێزەرانی شوێنەوار و گەشەپێدەرانی خانوبەرە دروست کردووە، دوای ئەوەی پڕۆژەیەکی نوێی بیناسازی مەترسی لەسەر ڕوخاندنی دروست کردووە.

ئەم شوێنەوارە کە لە ساڵی ٢٠٢٤دا وەک بەشێک لە "شەمەندەفەری ژێرزەوی" (ئەو تۆڕە نهێنییەی یارمەتی کۆیلە ڕاکردووەکانی دەدا) ناسێنرا، بە یەکەم شوێنی دەستکاری نەکراوی لەو شێوەیە دادەنرێت کە لە ماوەی ١٦٠ ساڵی ڕابردوودا لە نیویۆرک دۆزرابێتەوە. ئێستا پڕۆژەی

 دروستکردنی باڵەخانەیەکی ٩ نهۆمی لە تەنیشت مۆزەخانەکە، ترسی لای لێکۆڵەران دروست کردووە کە ببێتە هۆی تێکدانی ئەم پارچە گرنگەی مێژوو.

لێکۆڵەران دەڵێن ئەم بیرە یان شەفتە نهێنییە، بەڵگەیەکی بەرجەستەیە بۆ ئەو بوێرییەی کە لە سەدەی نۆزدەهەمدا بۆ ڕزگارکردنی مرۆڤەکان لە کۆیلایەتی بەکارهاتووە. مۆزەخانەی مێرچەنت هاوس کە خۆی بینایەکی مێژووییە، دەڵێت هەر کارێکی هەڵکەندن لە تەنیشتیان دەکرێت ببێتە هۆی داڕمان یان زیان گەیاندن بەم پێکهاتە ناسکە کە دەیان ساڵە بە شاراوەیی ماوەتەوە.

ئەم دۆزینەوەیە لە کاتێکدایە کە نیویۆرک هەوڵ دەدات شوێنەوارە پەیوەندیدارەکان بە مێژووی ڕەشتپێستەکان بپارێزێت. زۆرێک لە چالاکوانان پێیان وایە کە ئەمە تەنها کێشەیەکی بیناسازی نییە، بەڵکو ململانێیەکە لەنێوان بەرژەوەندی ئابووری و پاراستنی یادەوەرییەکی نەتەوەیی کە ساڵانێکی زۆر پەراوێز خراوە.

مێژووی ئەم ڕێڕەوانە دەگەڕێتەوە بۆ سەردەمی پێش جەنگی ناوخۆیی ئەمریکا، کاتێک چالاکوانانی دژە کۆیلایەتی بە نهێنی ماڵ و ژێرزەوییەکانیان بۆ حەشارگەی ئەوانە بەکاردەهێنا کە لە ویلایەتە باشوورییەکانەوە ڕایان دەکرد. دۆزینەوەی شوێنێکی ئاوا ساغ و بێ زیان لە جەرگەی مانهاتندا بە ڕووداوێکی دەگمەنی شوێنەوارناسی دادەنرێت.

ئەگەر ئەم ڕێڕەوە بپارێزرێت، دەبێتە ناوەندێکی گرنگ بۆ تێگەیشتن لە مێژووی ئازادی لە ئەمریکا، بەڵام ئەگەر پڕۆژە بیناسازییەکە بەردەوام بێت، ئەوا مەترسی هەیە یەکێک لە گرنگترین بەڵگە سەلمێنەرەکانی ئەو سەردەمە بۆ هەمیشە لەدەست بچێت.

سەرچاوە: ئاژانسە هەواڵییە جیهانییەکان