شۆڕشێکی نوێ لە دابەشکردنی فیلم؛ یو ئێس بی جێگەی ستریمینگ دەگرێتەوە؟

وێستگە ستایل - سۆلین عوسمان

ئاش کووک، کە یەکێکە لە داکۆکیکارە دیارەکانی سینەمای سەربەخۆ، خزمەتگوزارییەکی نوێی بە ناوی (Video StoreAge) راگەیاندووە کە ئامانجی گۆڕینی شێوازی گەیشتنی فیلمە بە بینەران. ئەم پڕۆژەیە پشت بە دابەشکردنی فیلمەکان لە ڕێگەی (USB) دەبەستێت لەبری ئەوەی تەنها پشت بە پلاتفۆرمە دیجیتاڵییە باوەکانی وەک نێتفلێکس و ئەمازۆن ببەستێت.

ئەم هەنگاوە لە راپۆرتێکی نوێی "گاردیان"دا بڵاوکراوەتەوە و تێیدا هاتووە کە ئامانجی سەرەکی دروستکردنی جۆرێکە لە "خاوەندارێتی بەردەوام". بەکارهێنەران کاتێک فیلمەکە لەسەر فلاشێک دەکڕن، بۆ هەمیشە دەبێتە موڵکی خۆیان و پێویستیان بە ئینتەرنێت یان بەشداری مانگانە نابێت. هەروەها ئەم سیستمە رێژەیەکی زیاتری قازانج بۆ فیلمسازان دەگەڕێنێتەوە و کۆنترۆڵی تەواویان بەسەر مافی بڵاوکردنەوەی بەرهەمەکانیاندا پێ دەبەخشێت.

یەکەم فیلم کە لە ڕێگەی ئەم خزمەتگوزارییەوە بڵاودەکرێتەوە، فیلمی (The People’s Joker)ی ڤێرا درووە. پڕۆژەکە وەک وەڵامێکی توند بۆ "ماندووبوونی بینەران لە ستریمینگ" (Streaming Fatigue) و ناسەقامگیری پلاتفۆرمەکان دەبینرێت، کە زۆرجار فیلمەکان بەبێ ئاگادارکردنەوە لادەبەن یان گۆڕانکاری لە نرخەکاندا دەکەن.

لە سەردەمی ئێستادا، بینینی فیلم بووەتە کارێکی کاتی و تێپەڕ، بە جۆرێک کە بینەر هەست بە خاوەندارێتی هیچ بەرهەمێک ناکات. ئاش کووک دەیەوێت ئەو هەستە کۆنەی کۆکردنەوەی فیلم (هاوشێوەی سەردەمی سیدی و ڤیکاس) بگەڕێنێتەوە، بەڵام بە تەکنەلۆژیایەکی سەردەمیانەتر و کوالێتییەکی بەرزتر.

ئەم دەسپێشخەرییە دەکرێت ببێتە رێگەیەکی رزگارکەر بۆ فیلمسازە سەربەخۆکان کە لە ناو جەنجاڵی پلاتفۆرمە گەورەکاندا ون دەبن. ئەگەر ئەم تاقیکردنەوەیە سەرکەوتوو بێت، رەنگە لە داهاتوودا ببینین کە کۆکردنەوەی فلاش میمۆری فیلمەکان ببێتە مۆدێلێکی نوێی کلتوری.

سەرچاوە: گاردیان