ڕۆژی ماریۆ؛ یادکردنەوەی ئەو کارەکتەرەی جیهانی یارییە ئەلیکترۆنییەکانی گۆڕی

وێستگە ستایل - سۆلین عوسمان

هەموو ساڵێک لە ڕێکەوتی ١٠ی ئازاردا، ملیۆنان گەیمەر لە سەرتاسەری جیهاندا یادی "ڕۆژی ماریۆ" دەکەنەوە، ئەو کارەکتەرە کورتەبنە و سمێڵپۆشەی کە نەک تەنها یارییەک بوو، بەڵکو بوو بە سیمبولی کولتوورێکی جیهانی و یادەوەری چەندین نەوەی پێکەوە گرێدایەوە

زۆر کەس نازانن کە ناوی ڕاستەقینەی ماریۆ لە بنەڕەتدا "Jumpman" (پیاوی بازدەر) بووە، کاتێک بۆ یەکەمجار لە ساڵی ١٩٨١ لە ناو یارییە ئەلیکترۆنییە بەناوبانگەکەی "Donkey Kong" دەرکەوت، بەڵام دواتر ناوەکەی گۆڕدرا بۆ ماریۆ و بوو بە کارەکتەری سەرەکی نینتێندۆ.

کارەکتەری ماریۆ لە ئاستی جیهانیدا بە یەکێک لە ناسراوترین دەموچاوەکان دادەنرێت، بە جۆرێک کە تاوەکو ئێستا زیاتر لە ٢٠٠ یاریی ئەلیکترۆنیی جیاواز لەسەر بنەمای چیرۆکی ژیان و توانا سەروو سروشتییەکانی ئەم کارەکتەرە بەرهەمهێنراون و فرۆشێکی خەیاڵییان هەبووە.

ماریۆ لە مێژووی یارییە ئەلیکترۆنییەکاندا خاوەنی چەندین دەستپێشخەرییە؛ ئەو یەکەم کارەکتەرە لە مێژوودا کە دەنگی تایبەتی پێبەخشراوە و هەستی پێدراوە، هەروەها یەکەم کارەکتەری یارییەکانیشە کە فیلمی سینەمایی گەورەی لەسەر بەرهەمهێنراوە و سەرکەوتنی گەورەی بەدەستهێناوە.

دیاریکردنی ڕێکەوتی ١٠ی ئازار (Mar10) وەک ڕۆژی ماریۆ، لە شێوازی نووسینی ناوەکەیەوە هاتووە (MAR 10)، کە کورتکراوەی ناوی ماریۆیە، ئەمەش بووەتە نەریتێکی ساڵانە بۆ کۆمپانیاکانی یاری و گەیمەران بۆ پێشکەشکردنی داشکاندن و یاریی نوێ.

ئایا تۆش یادەوەریت لەگەڵ ماریۆدا هەیە؟ یان کەسێک دەناسیت کە تاوەکو ئێستاش شارەزایەکی بێ وێنە بێت لە قۆناغە سەختەکانی ئەم یارییە کلاسیکییەدا؟

سەرچاوە: ماڵپەڕی فەرمی نینتێندۆ / گۆڤاری گەیم ئینفۆرمەر