هەوڵی کوشتنی ئەستێرەی جیهانی ریهانا لە ماڵەکەی خۆیدا دەدرێت

وێستگە ستایل - سۆلین عوسمان

ڕووداوێکی تەقەکردن لە ماڵی خانمە هونەرمەند و گۆرانیبێژی ناودار ریهانا، لە شاری لۆس ئەنجلس، دەنگدانەوەیەکی گەورەی لە میدیا جیهانییەکاندا دروست کردووە و بە هەوڵێکی تیرۆرکردن و کوشتن وەسف دەکرێت.

بەپێی زانیارییە سەرەتاییەکان، لە کاتێکدا ریهانا لەگەڵ هاوبەشی ژیانی و منداڵەکانیدا لەناو ماڵەکەی خۆیاندا بوون، دەستڕێژی گوللە لە ماڵەکەیان کراوە. سەرچاوە تەناهییەکان جەخت لەوە دەکەنەوە کە ئامانجی تەقەکەرەکە ڕاستەوخۆ گیانی ریهانا و خێزانەکەی بووە، بەڵام خۆشبەختانە هیچ کام لە ئەندامانی خێزانەکەی زیانیان پێنەگەیشتووە و هەموویان سەلامەتن.

لە دوای ڕووداوەکە، هێزە ئەمنییەکانی لۆس ئەنجلس لێکۆڵینەوەیەکی وردیان دەستپێکرد و توانییان تۆمەتبارەکە دەستنیشان بکەن. خانمێکی تەمەن ٣٥ ساڵ کە خەڵکی ویلایەتی فلۆریدایە، بە تۆمەتی ئەنجامدانی ئەم هێرشە دەستگیر کراوە. پۆلیس ڕایگەیاندووە کە لە کاتی هێرشەکەدا ترس و دڵەڕاوکێیەکی زۆر لە ناوچەکە دروست بووە، بەڵام سیستەمی پاراستنی ماڵەکە و دەستوەردانی خێرا ڕێگرییان لە کارەساتێکی گەورە کردووە.

ریهانا کە یەکێکە لە دەوڵەمەندترین و ناسراوترین ژنە هونەرمەندەکانی جیهان، پێشتریش ڕووبەڕووی هەراسانکردن بووەتەوە، بەڵام ئەم ڕووداوە کە بە چەک ئەنجام دراوە، مەترسییەکی نوێیە بۆ سەر ژیانی تایبەتی ئەو. ئێستا تۆمەتبارەکە لەژێر چاودێری پۆلیسدایە و دادگا بڕی ١٠ ملیۆن دۆلاری وەک بارمتە بۆ ئازادکردنی دیاری کردووە، ئەمەش نیشانەی قورسیی تاوانەکەیە.

ئەم ڕووداوە جارێکی دیکە پرسی پاراستنی کەسایەتییە ناودارەکانی لە ئەمریکا هێناوەتە پێشەوە، بەتایبەت کاتێک هێرشبەرەکە لە ویلایەتێکی دیکەوە بە مەبەستی ئەنجامدانی ئەم کارە گەشتیکردووە.

سەرچاوە: ئاژانسە هەواڵییە فەرمییەکانی ویلایەتە یەکگرتووەکانی ئەمریکا

PM:08:22:10/03/2026

ئه‌م بابه‌ته 72 جار خوێنراوه‌ته‌وه‌‌