ناسا ئامادەکاری بۆ گەشتە مێژووییەکەی سەر مانگ 

دەکات؛ ئارتەمیس ٢ لە مانگی ئازاردا هەڵدەدات

وێستگە ستایل - سۆلین عوسمان

ئاژانسی بۆشایی ئاسمانی ئەمریکا (ناسا) ڕایگەیاند کە ڕێکەوتی ٦ی ئازاری وەک زووترین کات بۆ هەڵدانی گەشتی "ئارتەمیس ٢" دیاریکردووە، کە یەکەم گەشتی مرۆییە بۆ دەوروبەری مانگ لە دوای زیاتر لە ٥٠ ساڵ.

ئەم بڕیارە دوای ئەوە هات کە ئەندازیاران توانییان کێشە تەکنیکییەکانی وەک دزەکردنی گازی هایدرۆجین چارەسەر بکەن کە ببووە هۆی دواکەوتنی تاقیکردنەوەکان لە بنکەی کەیپ کاناڤێراڵ. جێرید ئیساکمان، بەڕێوەبەری ناسا، ئەم هەنگاوەی بە "هەنگاوێکی گەورە" ناوبرد بۆ گەڕانەوەی مرۆڤ بۆ قووڵایی بۆشایی ئاسمان.

ئەم گەشتە کە ١٠ ڕۆژ دەخایەنێت، چوار کەشتیوانی تێدایە کە بریتین لە کریستینا کۆچ، ڤیکتۆر گڵۆڤەر، ڕید وایزمان و جێرمی هانسن کە کەشتیوانێکی کەنەدییە. ئەمە یەکەمجارە کەسێکی نائەمریکی بەشداری گەشتێکی مانگ بکات. کەشتیوانەکان لە ٢٠ی شوباتەوە چوونەتە ناو کەرەنتینەی تایبەت بۆ پاراستنی تەندروستییان پێش هەڵدانی کەشتییەکە.

لە ماوەی ڕابردوودا بەهۆی دزەکردنی گاز لە سیستەمی ساردکەرەوەدا، تاقیکردنەوەکان چەندین جار ڕاوەستان، بەڵام تاقیکردنەوەی کۆتایی کە بە "Wet Dress Rehearsal" دەناسرێت، بە سەرکەوتوویی ئەنجامدرا و سەلماندی کە هەموو سیستەمەکان بۆ هەڵدان ئامادەن.

ئەم گەشتە تەنها دەستکەوتێکی تەکنیکی نییە، بەڵکو گەڕانەوەی شکۆی مرۆڤایەتییە بۆ گەڕان لە بۆشایی ئاسماندا. ئارتەمیس ٢ دەبێتە بناغەیەک بۆ گەشتەکانی داهاتوو کە بڕیارە مرۆڤ بنێرێتە سەر ڕووی مانگ و دواتریش بۆ گەسارەی مەریخ.

سەرچاوە: ماڵپەڕی فەرمی ناسا / سپەیس دۆت کۆم