سۆنی بەرهەمە نوێیەکانی ٢٠٢٦ی ئاشکرا کرد؛ گۆڕانکاری گەورە لە جیهانی یارییە ئەلیکترۆنییەکاندا

وێستگە ستایل - سۆلین عوسمان

کۆمپانیای سۆنی لە یەکەم چالاکیی "State of Play"ی ساڵی ٢٠٢٦دا، کۆمەڵێک یاری نوێ و نوێکردنەوەی یارییە کۆنەکانی ڕاگەیاند، کە دیارترینیان دروستکردنەوەی سێینەی یاری "God of War" و یارییەکی نوێی "John Wick" بوو.

لە مەراسیمێکی کاتژمێرێکیدا، پلەی ستەیشن پلانی خۆی بۆ ساڵی ٢٠٢٦ خستە ڕوو، کە تێیدا مژدەی بە هەوادارانی "God of War" دا کە سێینە کۆنەکەی "گریت" بە گرافیکێکی سەردەمیانە بۆ PS5 دروست دەکرێتەوە، هەروەها یارییەکی نوێی ٢ دووری بەناوی "Sons of Sparta" هەر ئێستا بەردەستە.

یەکێکی تر لە سوپرایزە گەورەکان، یاری "John Wick" بوو کە بە دەنگ و ڕووخساری کانو ڕیڤز خۆی دروست کراوە و هەمان شێوازی شەڕکردنی فیلمەکانی تێدایە. هەروەها یاری "Resident Evil Requiem" ڕاگەیەندرا کە تێیدا "لیۆن کەنەدی" دەگەڕێتەوە بۆ بنکەی پۆلیسی ڕاکۆن سیتی و لە ٢٧ی شوبات بڵاودەکرێتەوە.

لە بەشێکی تری چالاکییەکەدا، کاتی بڵاوکردنەوەی چەند یارییەکی گرنگ دیاری کرا؛ یاری "Death Stranding 2" لە ١٩ی ئازار بۆ کۆمپیوتەر بڵاودەکرێتەوە، هەروەها یاری "James Bond: First Light" لە ٢٧ی ئایار و یاری "Metal Gear Solid Master Collection Vol. 2" لە ٢٧ی ئاب دەگەنە دەستی یاریکەران.

ئەم هەنگاوانەی سۆنی نیشانەی ئەوەیە کە کۆمپانیاکە دەیەوێت لە ڕێگەی نوێکردنەوەی یارییە کلاسیکییەکان و دروستکردنی پڕۆژەی نوێی وەک "John Wick"، پێگەی خۆی وەک پێشەنگی یارییە ئەلیکترۆنییەکان بپارێزێت و ساڵی ٢٠٢٦ بکاتە ساڵێکی پڕ لە سەرکێشی بۆ بەکارهێنەرانی.

سەرچاوە: بلۆگی فەرمی پلەی ستەیشن / ئای جی ئێن