باراک ئۆباما کۆتایی بە دەنگۆکانی "ناوچەی ٥١" و بوونەوەرە ئاسمانییەکان دەهێنێت: "هیچ بەڵگەیەکم نەبینیوە"

وێستگە ستایل - سۆلین عوسمان

باراک ئۆباما، چل و چوارەمین سەرۆکی ویلایەتە یەکگرتووەکانی ئەمریکا، لە نوێترین دەرکەوتنیدا لە پۆدکاستێکی بەناوبانگدا، پەردەی لەسەر یەکێک لە گەورەترین نهێنییەکان لادا کە بۆ ماوەی چەندین دەیەیە مێشکی خەڵکی جیهانی سەرقاڵ کردووە، ئەویش پرسی بوونی بوونەوەرە ئاسمانییەکان و حەشارگە نهێنییەکانی حکومەتی ئەمریکایە لە ناوچە قەدەغەکراوەکاندا.

لە میانی بەشداریکردنی لە پۆدکاستی (No Lie Podcast)، ئۆباما بە ڕاشکاوی باسی لەو زانیارییانە کرد کە لە ماوەی هەشت ساڵی سەرۆکایەتیەکەیدا لە کۆشکی سپی پێی گەیشتووە. ئەم لێدوانانەی ئۆباما لە کاتێکدایە کە ساڵانە بە هەزاران چیرۆک و تیۆریی پیلانگێڕی دەربارەی بینینی تەنە فڕیوە نەناسراوەکان (UFO) و پەیوەندییە نهێنییەکانی سوپای ئەمریکا لەگەڵ بوونەوەرە نادیارەکان بڵاودەکرێنەوە، کە زۆرجار وەک ڕاستی مامەڵەیان لەگەڵ دەکرێت.

ئۆباما لە لێدوانەکەیدا جەختی لەوە کردەوە کە سەرەڕای دەسەڵاتە فراوانەکانی وەک فەرماندەی گشتی هێزە چەکدارەکان، هەرگیز بەڵگەیەکی بەرجەستەی بۆ نەسەلمێنراوە کە بوونەوەرێک لە دەرەوەی زەوی سەردانی هەسارەکەمانی کردبێت. وتی: "لە ماوەی دەستبەکاربوون و کارکردنم وەک سەرۆکی ئەمریکا، هیچ بەڵگەیەکم لەسەر بوونی ئەم بوونەوەرانە نەبینیوە." هەروەها سەبارەت بە بنکەی سەربازیی ناسراو بە "ناوچەی ٥١" (Area 51) کە زۆرترین دەنگۆی لەسەرە، ئۆباما بە ڕاشکاوی ڕایگەیاند کە "لە ناوچەی ٥١ بوونەوەری ئاسمانیی لێ نییە و ژێرزەمینی نهێنییشیان نییە." ئەو بە گاڵتەجاڕییەوە ئاماژەی بەوەش کرد کە مەگەر پیلانگێڕییەکە هێندە زەبەلاح و قووڵ بێت کە تەنانەت لە سەرۆکی ویلایەتە یەکگرتووەکانی ئەمریکاشیان شاردبێتەوە.

"ناوچەی ٥١" کە دەکەوێتە ناوچەیەکی دوورەدەست لە ویلایەتی نیڤادا، بۆ ماوەی نیو سەدە زیاترە وەک ناوەندێکی پڕ لە نهێنی دەبینرێت و زۆرجار وەک تاقیگەیەک بۆ پاراستنی لاشەی بوونەوەرە ئاسمانییەکان و تەکنەلۆژیای دەرەوەی زەوی وەسف دەکرێت. ئەم پانتاییە بیابانییە بووەتە ئیلهامبەخش بۆ چەندین فیلم و زنجیرەی خەیاڵی، بەڵام حکومەتی ئەمریکا هەمیشە وەک ناوچەیەکی تاقیکردنەوەی فڕۆکە جەنگییە نهێنی و پێشکەوتووەکان ناساندوویەتی و ڕێوشوێنی ئەمنی زۆر توندی لەسەر پەیڕەو دەکات.

لێدوانەکانی ئۆباما وەک هەوڵێک دەبینرێت بۆ کەمکردنەوەی ئەو ترس و گومانانەی کە لە ناو بەشێکی زۆری خەڵکدا هەیە، بەڵام بۆ لایەنگرانی تیۆریی پیلانگێڕی، ئەم قسانە تەنها بەشێکن لەو "شاردنەوەیە"ی کە پێیان وایە ساڵانێکی درێژە بەردەوامە. هەرچۆنێک بێت، ئەم قسانەی یەکێک لە کاریگەرترین کەسایەتییەکانی جیهان جارێکی دیکە مشتومڕی لەسەر ئەو پرسیارە کۆنە دروست کردەوە: ئایا ئێمە لەم گەردوونەدا بە تەنهاین؟

سەرچاوە: پۆدکاستی No Lie و ئاژانسە هەواڵییە نێودەوڵەتییەکان

PM:07:34:20/02/2026

ئه‌م بابه‌ته 108 جار خوێنراوه‌ته‌وه‌‌