لە ژێر ناونیشانی "ڕازی گەردوون"؛ سلێمانی بۆ ماوەی دوو ڕۆژ باوەش بۆ دیداری عیرفانیی مەحوی دەگرێتەوە

وێستگە ستایل - سۆلین عوسمان

سەرجەم ئامادەکارییە لۆجستی و زانستییەکان بۆ سازدانی دیداری گەورەی مەحوی لە شاری سلێمانی کۆتاییان هاتووە، بڕیاریشە چالاکییەکانی ئەم دیدارە کە ڕەهەندێکی عیرفانی و ئەدەبی قووڵ لەخۆدەگرێت، بۆ ماوەی دوو ڕۆژی لەسەریەک بەردەوام بێت و تێیدا تیشک بخرێتە سەر لایەنە شاراوەکانی فیکر و فەلسەفەی یەکێک لە گەورەترین شاعیرانی کلاسیکی کورد.

بڕیارە ڕۆژانی ١٥ و ١٦ـی شوباتی ٢٠٢٦، کاتژمێر دووی پاش نیوەڕۆ، لە تەلاری هونەر لە شاری سلێمانی، دیدارەکە بە ناونیشانی "دیداری مەحوی و ڕازی گەردوون" دەستپێبکات. بەپێی ڕاگەیەندراوی فەرمیی ڕێکخەرانی دیدارەکە، ئەم کۆڕبەندە تەنها بۆ توێژەران نییە، بەڵکو بانگهێشتنامەیەکی گشتییە بۆ هەموو شەیدایانی ئەدەب و عیرفان تا ئامادەی ئەو گەشتە ڕۆحی و فیکرییە بن کە تێیدا شیعر و فەلسەفەی مەحوی ئاوێتەی یەکتر دەبن.

ئەم دیدارە بە سەرپەرشتی دوو لیژنەی باڵا و زانستی بەڕێوەدەچێت تاوەکو لە ڕووی کوالێتی و ناوەڕۆکەوە لە ئاست ناو و ناوبانگی مەحویدا بێت. لیژنەی باڵای دیدارەکە لە پێنج ئەندام پێکهاتووە کە بریتین لە: (هاوار شێخ ڕەووف وەک سەرۆکی لیژنە، حاکم سۆران عومەر مەحوی، وەرزێر شێخ سەروەر بەرزنجی، بیلال عەبدول محەمەد، و کەمال فاتح ڕەشید وەک ئەندام). لە لایەکی دیکەوە، لیژنەی زانستی کە ئەرکی هەڵسەنگاندنی تێز و بابەتە فیکرییەکانی لەئەستۆیە، لە (پ. د. عەلی تاهیر بەرزنجی وەک سەرۆکی لیژنە، د. تەحسین حەمە غەریب و م. سالار کەریم حسێن وەک ئەندام) پێکهاتوون.

بەرنامەی کاری ڕۆژی یەکەم پڕ دەبێت لە چالاکیی جۆراوجۆر؛ پاش خوێندنەوەی ئایەتەکان لە قورئانی پیرۆز و وەستان بۆ گیانی پاکی شەهیدان و مارشی نەتەوەیی "ئەی ڕەقیب"، وتاری ڕێکخراوی بەرزجا پێشکەش دەکرێت. دواتر لایەنی هونەری و مەقام دەستپێدەکات کە تێیدا هونەرمەند پێشەنگ غەفور "مەقامی سەفەر" و هونەرمەند لوقمان سەلیم مەقامێکی دیکە پێشکەش دەکەن. هەروەها بەڵگەفیلمێکی تایبەت لەسەر ژیان و کاروانی ئەدەبی مەحوی نمایش دەکرێت و دەقێکی ئەدەبیش بە دەنگی بیلال کەیوانی پێشکەش بە ئامادەبووان دەکرێت. 

هەر لە ڕۆژی یەکەمدا دوو پانێڵی زانستی بەڕێوەدەچن کە تێیدا پسپۆڕان قسە لەسەر قووڵاییەکانی هزری مەحوی دەکەن، هاوکات چەندین پارچە شیعری مەحوی لەلایەن کەسایەتییە جیاوازەکانەوە دەخوێندرێنەوە. ڕۆژی دووەمیش بە هەمان شێوە دوو پانێڵی دیکە و خوێندنەوەی شیعری لەخۆدەگرێت.

سازدانی ئەم دیدارە لەم کاتەدا، هەوڵێکە بۆ ڕێزگرتن لە قەڵەمی پڕندەیی و مێژوویی حەزرەتی مەحوی، کە وەک ئەستێرەیەکی گەش لە ئاسمانی ئەدەبی کوردیدا دەدرەوشێتەوە. مەحوی تەنها شاعیرێکی غەزەلنووس نەبووە، بەڵکو خاوەن فەلسەفەیەکی تایبەت بە خۆی بووە لە تێگەیشتن لە خودا، مرۆڤ و گەردوون. ئەم دیدارە دەیەوێت جارێکی دیکە نەوەی نوێ لەگەڵ ئەو ڕەهەندە عیرفانییانە ئاشنا بکاتەوە کە مەحوی لە قاڵبی شیعردا بەرجەستەی کردوون و وەک ڕازێکی گەردوونی بۆ مێژووی بەجێهێشتووە.

چاوەڕوان دەکرێت ئەم چالاکییە ببێتە یەکێک لە گەورەترین گردبوونەوە ئەدەبییەکانی ئەمساڵ لە شاری سلێمانی و ژمارەیەکی زۆر لە ڕووناکبیران، مامۆستایانی زانکۆ و خوێندکاران تێیدا بەشدار بن، تا لە نزیکەوە گوێبیستی ئەو لێکۆڵینەوە نوێیانە بن کە لەسەر بەرهەمەکانی مەحوی ئەنجام دراون و ئاوێتەی دەنگ و سۆزی مەقامە ڕەسەنەکان بن.

سەرچاوە: ڕاگەیەندراوی فەرمیی لیژنەی باڵای دیداری مەحوی و ڕازی گەردوون.

PM:01:26:15/02/2026

ئه‌م بابه‌ته 108 جار خوێنراوه‌ته‌وه‌‌