وەزیری پەروەردە بڕیارێکی بەپەلە لە بەرژەوەندی ئەو قوتابییەی کەرکووک دەردەکات کە بەهۆی کێشانی ئاڵای کوردستانەوە دەرکرابوو

وێستگە ستایل - سۆلین عوسمان

ئالان حەمە سەعید، وەزیری پەروەردەی حکومەتی هەرێمی کوردستان، بە فەرمی هاتە دەنگ لەسەر کێشەی ئەو منداڵە کوردەی لە شاری کەرکووک بەهۆی کێشانی وێنەی ئاڵای کوردستان لە قوتابخانەکەی دوورخرابووەوە. وەزیری پەروەردە ڕایگەیاند کە وەک پاڵپشتییەکی تەواو بۆ ئەو منداڵە و خێزانەکەی، بڕیاری داوە تەواوی تێچوو و پارەی خوێندنی ئەو منداڵە لەسەر ئەرکی خۆی بگرێتە ئەستۆ و ڕێگە نادەن بە هیچ جۆرێک لە پرۆسەی خوێندن بێبەش بکرێت.

ئەم بڕیارەی وەزیری پەروەردە دوای ئەوە هات کە لە چەند ڕۆژی ڕابردوودا، منداڵێکی کورد بەناوی (دیار خەلیل) کە لە قوتابخانەیەکی ئەهلی (ناحکومی) بە زمانی عەرەبی لە شاری کەرکووک دەیخوێند، لە کاتی وانەی هونەردا وێنەی ئاڵای کوردستانی کێشابوو. دوای ئەم کارە، کارگێڕی قوتابخانەکە لەبری هاندانی بەهرەکەی، بڕیاری دەرکردن و دوورخستنەوەی ئەو منداڵەیان لە خوێندن دا، ئەمەش کاردانەوەی زۆری لە تۆڕە کۆمەڵایەتییەکان و ناوەندە پەروەردەییەکاندا لێکەوتەوە.

وەزیری پەروەردە لە پەیامێکدا دڵنیایی دایە کەسوکاری دیار و ڕایگەیاند، "دڵنیابن نایەڵین ئەم منداڵە لە خوێندن بێبەش بکرێت و ئەوەی پێویست بێت بۆی ئەنجام دەدەین." هەروەها ئاماژەی بەوەش کرد کە جگە لە گرتنە ئەستۆی تێچووی خوێندنەکەی، هەموو قوتابخانە کوردییەکانی سەر بە وەزارەتی پەروەردەی هەرێم لە شاری کەرکووک دەرگایان لەبەردەم ئەو قوتابییەدا واڵایە و دەتوانێت لە هەر کامێکیان بیەوێت درێژە بە خوێندنەکەی بدات بەبێ هیچ ئاستەنگێک.

شاری کەرکووک کە ناوچەیەکی جێناکۆکە، زۆرکات پرۆسەی خوێندن و هێما نەتەوەییەکان تێیدا دەبنە جێگەی مشتومڕ، بەتایبەت لەو قوتابخانە ناحکومییانەی کە پابەندی پڕۆگرامەکانی حکومەتی فیدراڵین. دەرکردنی قوتابییەک تەنها بەهۆی کێشانی وێنەی ئاڵایەک، لەلایەن چالاکوانانەوە وەک "هەوڵێک بۆ کپکردنی ناسنامەی نەتەوەیی" و "کارێکی نادادی بەرامبەر بە مافەکانی منداڵ" لەقەڵەم درا، کە دواتر دەستوەردانی باڵاترین دەسەڵاتی پەروەردەیی لە هەرێمی کوردستانی لێکەوتەوە.

ئەم هەڵوێستەی وەزارەتی پەروەردە وەک پشتگیرییەک بۆ خوێندنی کوردی و پاراستنی شکۆی قوتابیان لە ناوچە کوردستانییەکانی دەرەوەی ئیدارەی هەرێم دەبینرێت. چاوەڕوان دەکرێت لە چەند ڕۆژی داهاتوودا ڕێکارە یاسایی و کارگێڕییەکان بۆ گواستنەوەی دیار خەلیل بۆ قوتابخانەیەکی نوێ تەواو بکرێن، تاوەکو بتوانێت بە ئازادی و لە ژینگەیەکی لەباردا درێژە بە خەونەکانی و خوێندنەکەی بدات.

نووسینگەی ڕاگەیاندنی وەزیری پەروەردەی حکومەتی هەرێمی کوردستان.

PM:08:04:28/01/2026

ئه‌م بابه‌ته 92 جار خوێنراوه‌ته‌وه‌‌