بێلا حەدید و پرسی کورد؛ لە پاڵپشتییەکی کورتخایەنەوە بۆ پاشەکشە و ڕووبەڕووبوونەوەی شەپۆلێکی ڕەخنەی توند

وێستگە ستایڵ - سۆلین عوسمان

بێلا حەدید، خانمە مۆدێلی بەناوبانگی جیهانی و یەکێک لە کاریگەرترین کەسایەتییەکانی ناو تۆڕە کۆمەڵایەتییەکان، جارێکی دیکە بووەوە بە سەردێڕی هەواڵە گەرمەکان، بەڵام ئەمجارەیان نەک بەهۆی کارە مۆدێلەکان و چالاکییە مرۆییەکانی، بەڵکو بەهۆی هەڵوێستێکی کورتخایەن و پاشان سڕینەوەی پۆستێکی تایبەت بە پرسی کورد. ئەم هەنگاوەی ناوبراو لە ناوەندە جەماوەرییەکاندا دەنگدانەوەیەکی گەورەی بەدوای خۆیدا هێنا و بەشێکی زۆری شوێنکەوتووانی لە کوردستان و ناوچەکە تووشی بێهیوایی و توڕەیی کرد، چونکە وەک جۆرێک لە "پاشەکشە لە پرەنسیپەکان" لێکدرایەوە.

ئەم ڕووداوە لە کاتێکدایە کە پرسی کورد و خەبات بۆ ئازادی و دەستەبەرکردنی مافە بنەڕەتییەکان هەمیشە لە ناوەندە جیهانییەکاندا باس و خواستی گەرمیان لەسەرە. زۆرجار کەسایەتییە کاریگەرەکانی جیهان بۆ دەربڕینی هاوسۆزی، پەیامەکانیان لە پلاتفۆرمە جیاوازەکان بڵاودەکەنەوە تا دەنگی گەلانی ستەمدیدە بگەیەننە جیهان. بەڵام کاتێک ئەو پاڵپشتییە تەنها بۆ چەند کاتژمێرێک دەبێت و پاشان دەسڕێتەوە، پرسیاری زۆر لەبارەی ڕاستگۆیی ئەو کەسایەتییانە و ئاستی فشاری کۆمپانیا و لایەنە سیاسییەکان لەسەر ئەستێرەکان دروست دەکات، کە ئایا تا چەند دەتوانن لەسەر بڕیارەکانیان سوور بن.

بێلا حەدید لەسەر هەژماری فەرمی خۆی لە ئینستاگرام، کە زیاتر لە ٦٠ ملیۆن فۆڵۆوەری هەیە، پۆستێکی بڵاوکردەوە و تێیدا بە ڕاشکاوی ئاماژەی بە "ئازادیی کوردستان" و پاڵپشتیکردنی مافەکانی گەلی کورد دابوو. بەڵام تەنها دوای تێپەڕبوونی ماوەیەکی زۆر کورت، ناوبراو پۆستەکەی سڕییەوە. ئەم هەنگاوە دەمودەست کاردانەوەی توندی بەدوای خۆیدا هێنا و بەشێکی زۆر لە چاودێران دەڵێن: "بێلا لە ترسی لەدەستدانی گرێبەستە گەورەکانی و فشارە دەرەکییەکان وای کردووە". لە بەرامبەردا، کەمپەینێکی ناڕەزایەتی بەرفراوان دەستی پێکردووە کە تێیدا بەکارهێنەران وێنەی کەزیی کچان وەک هێمایەکی بەرگریی کوردی بڵاودەکەنەوە و بە هاشتاگ و دروشمی جیاواز دەنووسن: "ئێمە وەک بێلا حەدید نین و لە ئازادیی کوردستان پاشەگەز نابینەوە"، ئەمەش وەک ئاماژەیەک بۆ ئەوەی کە پرسی ئازادی بە پۆستێک دەست پێناکات و بە سڕینەوەی پۆستێکیش کۆتایی نایەت.

بێلا حەدید کە بە ڕەچەڵەک فەڵەستینییە، هەمیشە وەک یەکێک لە بوێرترین مۆدێلەکان بۆ داکۆکیکردن لە پرسی فەڵەستین ناسراوە. ئەو چەندین جار ڕووبەڕووی فشاری توند و تەنانەت هەڕەشەی بڕینی گرێبەستەکانی بووەتەوە لەگەڵ براندە جیهانییەکانی وەک "دیۆر" و "شانێڵ"، بەڵام لەسەر ئەو پرسە نەتەوەییەی خۆی هەرگیز پاشەکشەی نەکردووە. 

هەر بۆیە، سڕینەوەی خێرای پۆستەکەی سەبارەت بە کورد بۆ زۆرێک جێگەی سەرسوڕمان و ڕەخنە بوو، چونکە چاوەڕوانی ئەوەیان لێدەکرد هەمان ئەو پێداگری و خۆڕاگرییەی هەبێت کە بۆ دۆزی فەڵەستین هەیەتی و ململانێی سیاسییەکان کاریگەری نەکاتە سەر هەڵوێستە مرۆییەکانی.

لە ئێستادا ئەم خانمە مۆدێلە لەبەردەم تاقیکردنەوەیەکی گەورەی جەماوەریدایە و ناوبانگی لە ناوچەکەدا کەوتووەتە ژێر پرسیارەوە. هەرچەندە تا ئێستا بێلا حەدید هیچ ڕوونکردنەوەیەکی فەرمی لەبارەی هۆکاری سڕینەوەی پۆستەکە یان ئەو فشارانەی کە ڕەنگە لەسەری بووبن بڵاونەکردووەتەوە، بەڵام ئەم ڕووداوە جارێکی دیکە ئەو ڕاستییەی سەلماندەوە کە ڕای گشتی و بەتایبەت گەلی کورد، زۆر بە وردی چاودێری هەڵوێستی کەسایەتییە جیهانییەکان دەکەن و تەنها دروشمێکی کورتخایەن بەس نییە بۆ بەدەستهێنانی متمانەی گەلانێک کە ساڵانێکی 

درێژە قوربانی بۆ پاراستنی ناسنامەی خۆیان دەدەن.

سەرچاوە: تۆڕە کۆمەڵایەتییەکان و ئاژانسەکانی هەواڵ

PM:12:13:27/01/2026

ئه‌م بابه‌ته 88 جار خوێنراوه‌ته‌وه‌‌