بێلا حەدید پشتیوانی بۆ ئازادیی کوردستان دەردەبڕێت و ڕووبەڕووی شەپۆلێکی ناڕەزایەتی دەبێتەوە

وێستگە ستایل - سۆلین عوسمان

خانمە مۆدێلی جیهانی و ناوداری ئەمریکی، بێلا حەدید، جارێکی دیکە بەهۆی هەڵوێستە مرۆیی و سیاسییەکانیەوە بووەوە بە باسی گەرمی میدیاکان و تۆڕە کۆمەڵایەتییەکان. ئەم خانمە کە بەوە ناسراوە هەمیشە دەنگی خۆی بۆ گەلە ستەملێکراوەکان بەرز دەکاتەوە، ئەمجارەیان بە ئاشکرا پاڵپشتی خۆی بۆ دۆزی کورد و ئازادیی کوردستان دەربڕی، ئەمەش کاردانەوەی فراوانی لە ئاستی جیهانی و ناوچەیی لێکەوتەوە.

لە نوێترین چالاکیدا لە هەژماری فەرمی خۆی لە تۆڕی کۆمەڵایەتی ئینستاگرام، بێلا حەدید پەیامێکی بڵاوکردەوە و تێیدا هاوسۆزی خۆی بۆ گەلی کورد نیشاندا و داوای "ئازادیی بۆ کوردستان" کرد. ئەم پەیامەی بێلا تەنها نووسینێکی سادە نەبوو، بەڵکو وەک هەڵوێستێکی سیاسی بوێر لە قەڵەم درا، بەتایبەت کە ئەو وەک یەکێک لە کاریگەرترین کەسایەتییەکانی جیهان لە بواری مۆدێلینگ و سۆشیاڵ میدیادا دەناسرێت و ملیۆنان فۆڵۆوەری لە سەرتاسەری جیهاندا هەیە.

بەهۆی ئەم هەڵوێستە و پشتیوانیکردنی لە مافەکانی گەلی کورد، بێلا حەدید ڕووبەڕووی شەپۆلێکی توندی ڕەخنە بووەوە، بەتایبەتی لەلایەن بەکارهێنەرانی تۆڕە کۆمەڵایەتییەکان لە وڵاتانی تورکیا و هەندێک لە وڵاتانی عەرەبی. بەپێی ئامارە سەرەتاییەکان، تەنها لە ماوەی چەند کاتژمێرێکی کەمدا دوای بڵاوکردنەوەی پەیامەکەی، ئەم خانمە مۆدێلە دەیان هەزار فۆڵۆوەری تورک و عەرەبی لەدەستداوە. ناڕازییەکان لە کۆمێنتەکاندا هێرشی توندیان کردووەتە سەری و هەڵوێستەکەیان بە دەستوەردان لە کاروباری ناوخۆیی وڵاتەکانیان و پشتیوانیکردن لە "جوداخوازی" وەسف کردووە.

بێلا حەدید کە بە ڕەچەڵەک فەڵەستینییە، پێشتریش چەندین جار باجی قورسی داوە لەپێناو دەربڕینی بیروڕا سیاسییەکانی. ئەو یەکێکە لە سەرسەختترین بەرگریکارەکانی دۆزی فەڵەستین و بەهۆی ئەوەوە چەندین گرێبەستی گەورەی لەگەڵ براندە جیهانییەکان لەدەستداوە و ڕووبەڕووی هەڕەشەی جۆراوجۆر بووەتەوە. بێلا هەمیشە جەخت لەوە دەکاتەوە کە مرۆڤایەتی و دادپەروەری بۆ ئەو لە سەروو هەموو بەرژەوەندییە مادییەکان و ناوبانگەوەیە، هەر بۆیە سڵ نەکردنەوەی لە پشتگیریکردنی کورد، درێژەپێدەری هەمان ئەو ڕێچکەیەیە کە لە کارە مرۆییەکانیدا گرتوویەتیە بەر.

ئەم هەڵوێستەی بێلا حەدید لە کاتێکدایە کە زۆربەی ئەستێرە و ناودارانی جیهان لە ترسی لەدەستدانی جەماوەر و لایەنگرەکانیان، خۆیان لە قسەکردن لەسەر پرسە سیاسییە هەستیارەکان بەدوور دەگرن. بەڵام بێلا بەم هەنگاوەی سەلماندی کە ئامادەیە ڕووبەڕووی هەر فشارێک ببێتەوە لەپێناو ئەو پەیامانەی بڕوای پێیانە. لە بەرامبەر لەدەستدانی فۆڵۆوەرە ناڕازییەکان، هەزاران بەکارهێنەری کورد و چالاکوانانی مافی مرۆڤ لە سەرانسەری جیهانەوە دەستخۆشییان لێکردووە و پەیامەکەیان بەرز نرخاندووە.

سەرچاوە: تۆڕی کۆمەڵایەتی ئینستاگرام و ئاژانسەکانی هەواڵ

PM:12:03:22/01/2026

ئه‌م بابه‌ته 128 جار خوێنراوه‌ته‌وه‌‌