سەهۆڵەکە؛ ئەو کارگەیەی کە ناوی ناوچەیەکی گۆڕی

وێستگە ستایل - سۆلین عوسمان

شەقامی سەهۆڵەکە لە سلێمانی، کە ئێستا ناوەندێکی زیندوی ڕۆشنبیری و کۆبوونەوەی گەنجانە، مێژووەکەی بۆ دەستپێشخەرییەکی پیشەسازی پیاوێکی ئەرمەنی دەگەڕێتەوە. ئەم شوێنە کە ناوی "سەهۆڵەکە"ی لێ نراوە، پێش ئەوەی ببێتە شوێنی گەشتوگوزار، ناوەندی ساردکردنەوەی جەستەی ماندووی خەڵکی شار بووە لە گەرمای هاویندا.

چیرۆکەکە لە ساڵی ١٩٦١ دەست پێ دەکات، کاتێک پیاوێکی ئەرمەنی بە ناوی (گەڕەبێت ئۆهانس نەعلبەندیان) بڕیاری دا یەکەمین کارگەی بەرهەمهێنانی سەهۆڵ لە شاری سلێمانی دابمەزرێنێت. ئەم کارگەیە کە ناوی "کارگەی سەهۆڵی قەندیل" بوو، لەو جادەیەی کە ئێستا بە پشتی سەهۆڵەکە ناسراوە دروستکرا و بووە وەرچەرخانێکی گرنگ لە ژیانی ڕۆژانەی خەڵکدا.

لەو سەردەمەدا کە ئامێری ساردکەرەوە لە ماڵەکاندا نەبوو، ئەم کارگەیە ش شا دەمارێکی گرنگی ژیان بوو. کاسبکاران و خەڵکی شار بە ئەسپ و عەرەبانە دەهاتنە بەردەم کارگەکە، قاڵبە سەهۆڵەکانیان وەردەگرت و دەیانبرد بۆ ماڵەکان، چایخانەکان، مەتەعمەکان و دوکانەکانی ناو بازاڕ. هەر کەسێک ڕێی بکەوتایەتە ئەو ناوچەیە، تەنها یەک ناوی دەزانی: "سەهۆڵەکە".

لە ساڵی ٢٠٢١دا، بەشێکی زۆری بینای کارگەکە تێکدرا بۆ ئەوەی بکرێتە پڕۆژەی بازرگانی، بەڵام بۆ پاراستنی مێژووەکەی، نزیکەی ٣٠٠ مەتری لە کارگەکە هێڵدراوەتەوە. جێگەی سەرنجە کە ئەو بەشە بچووکە هێشتاش بەردەوامە لە بەرهەمهێنانی سەهۆڵ، وەک ئەوەی بییەوێت بڵێ مێژوو بە ئاسانی لەناو ناچێت.

ئەمڕۆ هەرچەندە کارگەکە وەک جاران گەورە نییە و شێوازی شارەکە گۆڕاوە، بەڵام ناوەکە هێندە بەهێزە کە هەموو شەقامەکەی بەو ناوەوە ناسراوە. "سەهۆڵەکە" لە وشەیەکی سادەوە بووەتە براندێکی ناسراوی سلێمانی و هەمووان کاتێک دەیانەوێت پیاسەیەک بکەن، دەڵێن "دەچین بۆ سەهۆڵەکە".

سەرچاوەی ئەم زانیارییانە دەگەڕێتەوە بۆ مێژووی پڕۆژە پیشەسازییەکانی سلێمانی و بنەماڵەی نەعلبەندیان، کە وەک بەشێکی ڕەسەن لە پێکهاتەی کۆمەڵایەتی شارەکە ناسراون.

PM:09:35:17/01/2026

ئه‌م بابه‌ته 76 جار خوێنراوه‌ته‌وه‌‌