بریکارەکەى دۆناڕۆما هێرشدەکاتە سەر پاریس سانجێرمان
.jpg)
وێستگە سپۆرت-
ئینزۆ ڕایۆلا، بریکاری جیانلویجی دۆنارۆمای گۆڵپارێزی پاریس سانجێرمان، بێدەنگییەکەی شکاند و لێدوانێکی لەسەر ڕۆیشتنی لە یانە فەرەنسییەکەدا.
دوێنێ سێشەممە دۆنارۆما بە فەرمی ڕۆیشتنی لە پاریس سانجێرمان ڕاگەیاند، یانە پایتەختی فەرەنسا ڕێگەی بە ڕۆیشتنی ئەو یاریزانە ئیتاڵییە دەدات ئەگەر ئۆفەرێکی باشی بۆ هات.
ڕایۆلا توڕەیی خۆی دەربڕی بەرامبەر ئەو شێوازەی پاریس سانجێرمان بڕیاریدا ڕێگە بە دۆنارۆما بدات بڕوات.
ڕایۆلا بە سکای سپۆرتی ڕاگەیاند: دۆنارۆما زۆر پەشیمانە لەوەی ڕوویدا، لە دە ڕۆژی ڕابردوودا ئەو مێژووەی لە ماوەی چوار ساڵدا لە پاریس سانجێرمان تۆماریکرد سڕاوەتەوە، بەم هەڵوێستەى یانەکە تووشی شۆک بووم.
ئاماژەی بەوەشکرد، پاریس سانجێرمان مەرجەکانی گرێبەستە نوێیەکەی دۆنارۆمای گۆڕی، ئێستا ڕاوێژ لەگەڵ هاوکارەکانم دەکەم بۆ گفتوگۆکردن لەسەر تەواوی دۆخەکە.
سەبارەت بە شوێنی داهاتووی دۆنارۆما وتی: ڕەنگە تەنها لە خولی نایابی ئینگلیزیدا بتوانن داواکارییە داراییە زیادەڕەوییەکانی پاریس سانجێرمان دابین بکەن، باس لە ڕێزگرتن دەکەن، بەڵام لەم قۆناغەدا ڕەنگە ڕێزگرتن تەنها لە ڕێگەی پارەوە بێت بۆیان.
بەگوێرەی زانیارییەکان، یانەی مانچستەر سیتی لەگەڵ دۆنارۆما گەیشتووەتە ڕێککەوتنێکی تەواو بۆ ئەوەی لە ماوەی گواستنەوەی هاوینەی ئێستادا گرێبەستی لەگەڵدا بکات.
AM:11:40:13/08/2025
ئه‌م بابه‌ته 428
جار خوێنراوه‌ته‌وه