ئیساك بڕیاریداوە جارێکی دیکە درێسی نیوکاسڵ نەپۆشێتەوە
وێستگە سپۆرت-
ئالیکساندەر ئیساكی سویدی بەردەوامە لە فشارەکانی و بڕیاریداوە جارێکی دیکە درێسی نیوکاسڵ نەپۆشێتەوە.
تاکو ئێستا هێرشبەرەکە بە تەنیا ڕاهێنان ئەنجام دەدات و دەیەوێت پەیوەندی بە لیڤەرپووڵەوە بکات و لەسەر مەرجە تاکەکەسییەکان ڕیککەوتوون، بەڵام نیوکاسڵ ڕێگە بە ڕۆیشتنی نادات.
دەیڤد ئۆرنشتاینی ڕۆژنامەنووسی متمانەپێکراو بڵاوی کردەوە، هێرشبەرەکە تەمەن 25 ساڵەکە پێیوایە یاریکردنی لە نیوکاسڵ کۆتایی هاتووە و جارێکی دیکە درێسی تیپەکە ناپۆشێتەوە.
سەرچاوەکە ڕوونی دەکاتەوە، هەرچەندە نیوکاسڵ بەنیازی فرۆشتنی نییە، بەڵام بەردەوامن لە هەوڵەکانیان بۆ ئەوەی شوێنگرەوەی بگوازنەوە، جگە لەوەی لیڤەرپووڵ 120 ملیۆن پاوەندی پێشکەش کردووە و ڕەت کراوەتەوە، چونکە نیوکاسڵ 150 ملیۆن پاوەندی بنەڕەتی دەوێت بەبێ پاداشتەکان.
لە کۆتایدا باس لەوەکراوە، ئیساك تەنانەت بڕیاریداوە ئەگەر لەم هاوینە نەچێتە لیڤەرپووڵ هەر یاریی بۆ نیوکاسڵ ناکاتەوە، جگە لەوەش ماڵەکەی خۆی لە شاری نیوکاسڵ جێهێشتووە.
PM:06:03:12/08/2025
ئه‌م بابه‌ته 436
جار خوێنراوه‌ته‌وه