تەمەنیان لەسەرو 100ساڵەوەیە... بەساڵاچووانی ئیتاڵیا چۆن چۆنی بەسەر ڤایرۆسی كۆرۆنادا سەركەوتن؟


وەرگێڕانی: هەورامان وریا قانع

بەمدواییانە چیرۆكی بەساڵاچوانی ئیتاڵیا كە تەمەنیان لەسەرو سەد ساڵەوەیە، بووە جێگای بایەخی هەموان، چونكە ئەوان توانیان بەسەر ڤایرۆسی كۆرۆنادا سەركەون، ڤایرۆسێك رۆژانە لەسەرتاپای جیهاندا، رۆحی هەزاران كەس دەكێشێت، بە تایبەت لە وڵاتەكەیان ئیتاڵیا كە بە هۆی پەتاكەوە، تێیدا بەرزترین رێژەی مردن تۆمار كراوە.

ئەو بەساڵاچووانە، لە شارە جیاوازەكانی ئیتاڵیادا دادەنیشن و ژیانێكی سادە و خاكیانە دەژین. هەندێكیان لەگەڵ كەسوكاریاندان، هەندێكی دیكەیان لە خەڵوەتگەی پیرین، بەڵام خاڵی هاوبەشی نێوانیان ئەوەیە یادەوەرییەكی بەهێزیان هەیە، حەزیان لە ژیانە ئەگەرچی لە فۆرمە زۆر سادە و ساكارەكەشیدا بێت، وەك خوێندنەوەی رۆژنامە یان پیاسەیەك بەناو گەڕەكدا یاخود خواردنی ژەمە خۆراكێك لەگەڵ خزم و كەسوكار یا سەیركردنی پێشبڕكێیەكی وەرزشی.

رۆژنامەی (كۆریری دیلا سیرا) بەدواداچونی بۆ بەسەرهاتی ژیانی ئەو بەساڵاچوانە كردووە كە پڕە لە ڕوودا و هەڵوێست، رۆژنامەكە دەڵێت "ئەلبێرتۆ بیلوشی" تەمەن 101 ساڵ، بەشداری جەنگی دووەمی جیهانی كردووە، لەسەر دەستی ئەڵمانەكان دوو جار ئەسیر كراوە، بەڵام توانیویەتی رابكات. پێش دوو هەفتە لەمەوبەر روبەڕووی دوژمنێكی دیكە بووەتەوە كە ناوی ڤایرۆسی كۆرۆنایە. دوای ئەوەی دوو هەفتە لە نەخۆشخانەی شاری ریمینی دەمێنێتەوە، بەسەر ڤایرۆسەكەدا سەردەكەوێت.

هەرچی "ئادا زانوسو"ە كە لە رۆژی 16 ئابی داهاتوو، تەمەنی دەبێت بە 104 ساڵ، ئەو ئەگەر چی هێند لاوازە لە باڵندەی (فیڕنەگولە- النمنمە) دەچێت، بەڵام لەگەڵ ئەوەشدا زۆر خۆڕاگرە. تا ئێستاش خاوەنی یادەوەرییەكی بەهێزە، لە شاری بییللای نزیك شاری تۆرۆنتۆ لە خەڵوەتگەی پیری دەژی. 

ئەم خانمە دوای ئەوەی لەسەرەتای مانگی ئازاری ئەمساڵ، دووچاری ڤایرۆسی كۆرۆنا دەبێت و رەوانەی نەخۆشخانە دەكرێت. دواتر پاش مانەوەی بۆ ماوەی دوو هەفتە لە نەخۆشخانە و چاكبوونەوەی، سەرنجی میدیا جیهانییەكان بەلای خۆیدا رادەكێشێت. نەوەكانی نهێنی تەمەن درێژییەكەی بۆ ئەوە دەگەڕێننەوە كە خاوەنی (تەبعێكی جوان و ئیرادەیەكی بەهێزە)، بەشێوەیەكی بەردەوام و رێكوپێك كتێب و وێرد و سەڵاواتی ئاینی دەخوێنێتەوە).

ئەگەرچی "ئیتالیكا گرۆندۆنا" تەمەنی بووە بە 102 ساڵ، كەچی هێشتا حەزێكی زۆری لە مۆسیقای رۆكە و گرنگییەكی زۆریش بە پێشبڕكێ وەرزشییەكان دەدات، یەكێك لە نەوەكانی دەڵێت: "ئەم خانمە هەمیشە حەزی لە سەما بووە، سۆز و عەشقێكی گەورەی بۆ وەرزش هەیە. لە رێگەی شاشەی تەلەفزیۆنەوە، سەیری هەمو شتێكی وەرزشی دەكات، لە پێشبڕكێكی پاسكیلسوارییەوە بۆ پێشبڕكێكی ئۆتۆمۆبێل بۆ جێمی هونەری و لەوێشەوە بۆ خلیسكانێی سەر بەفر. بەڵام حەزی لە تۆپی پێ نییە".

خانم گرۆندۆنا لە شاری جەنەوا و لە كۆتاییەكانی مانگی شوباتی رابردوو بەهۆی كێشەی دڵ و هەندێك دەرهاویشتەی نەخۆشی شەكرە، دەبرێت بۆ نەخۆشخانە، بەڵام پشكنینەكان دەریدەخەن تووشی كۆرۆنا بووە. پێش هەفتەیەك لەمەوبەر، لە كۆرۆنا چاكبوەوەو نەخۆشخانەی بەجێهێشت، لێرەوە كۆمەڵێ میدیای جیهانی بەسەرهاتەكەی دەگوێزنەوە و سەرنجی هەموان بۆلای خۆی رادەكێشێت. بگرە پاڵەوانی پێشبڕكێكی پاسكیلسواری بەناوبانگ "ڤالنتینۆ روسی" كە گرۆندۆنا زۆر سەرسامە پێی، پەیوەندی بە گرۆندۆنا دەكات و هەواڵی تەندروستییەكەی دەپرسێت. تا ئێستاش ئارەزوویەكی باشی بۆ خواردن هەیە، یەكێك لە خزمەكانی بە گاڵتەوە دەڵێت: "لە راستیدا ئەو هەمیشە برسییەتی".

"مایكل ئەنجلۆ سكوتیلا"ی تەمەن 97 ساڵ، لە شاری كریمۆنای پارێزگای لۆمباردیا (باكوری ئیتالیا) دەژی، لە ئیتالیا ناوچەی لۆمباردیا كانگەی بڵاوبوونەوەی ڤایرۆسەكەیە. مایكل ئەنجلۆ پێش دوو هەفتە لەمەوبەر لە نەخۆشی ڤایرۆسی كۆرۆنا چاكبوەوە، هەنووكە چاوەڕوانی ئەوەیە ژیانی ئاسایی خۆی دەست پێبكاتەوە، بەوەی بڕوات بۆ كۆشكی رۆژنامەكان و بازاڕكردن و چێشت لێنان. ئەم بەساڵاچووە لە ژیانی میهەنی خۆیدا، فەرمانبەر بووە، بەڵام لەگەڵ ئەوەشدا ئەفسەری دەریاوانی بووە. لە ئێستادا كاتەكانی بە خوێندنەوەی رۆژنامەكان و كتێب و سەیركردنی تەلەفزیۆنەوە بەسەر دەبات.

سەرچاوە
الجیزیرە نیت 7-4-2020


PM:05:33:10/04/2020


ئه‌م بابه‌ته 1592 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

هەواڵی پەیوەندیدار

زۆرترین خوێندراو