مه‌سرور بارزانی: هەرێمی کوردستان بەردەوامە لە پاراستن و حەواندنەوەی هەزاران پەناخواز


وێستگه‌ نیوزـ

بە ئامادەبوونی مەسرور بارزانی سەرۆکی حکومەتی هەرێمی کوردستان و ئەلینا ڕۆمانۆسکی باڵیۆزی ئەمریکا لە عێراق و نوێنەری کۆمسیاری باڵای نەتەوە یەکگرتووەکان بۆ کاروباری پەنابەران (UNHCR)، ڕێوڕەسمی ڕاگەیاندنی ڕێنمایی ڕێکخستنی کاروباری پەناخوازان لە هەرێمی کوردستان بەڕێوەدەچوو.

لە ڕێوڕەسمەکەدا كه‌ ئه‌مرۆ چوارشه‌ممه‌ به‌رێوه‌چوو، باڵیۆزی ئەمریکا وتارێکی پێشکەش کرد و پاشان لەلایەن ڕێبەر ئەحمەد وەزیری ناوخۆی حکومەتی هەرێمی کوردستان ڕێنماییە کارگێڕییەکان واژۆ کرا.

دواتر سەرۆکی حکومەت لە وتارێکدا دووپاتی کردەوە کە ئەم ڕێنماییانە بەشێکە لە بەرنامەکانی حکومەتی هەرێمی کوردستان لە بواری کارگێڕی و یاسایی بە ئاراستەی پاراستنی مافەکانی پەناخوازان و پەنابەران و دیاریکردنی ئەرکەکانیان. بەتایبەتی لە بواری ڕێکخستن و یەکخستنی ڕێکارەکانی هاتن و پێشوازیکردن لە پەناخوازان و چەسپاندنی ماف و ئەرکەکانیان لە هەرێمی کوردستان.

دەقی وتاری سەرۆکی حکومەت:

بە ناوی خوای گەورە و میهرەبان
بەڕێزان، باڵیۆزی ویلایەتە یەکگرتووەکانی ئەمریکا، نوێنەری نەتەوە یەکگرتووەکان، ئامادەبووانی هێژا، میوانانی قەدرگران، زۆر زۆر بەخێربێن. خۆشحاڵم، ئەمڕۆ لێرە بەم بۆنەوەیە لەگەڵ یەکین لە خزمەتی ئێوەی بەڕێز.
سوپاس بۆ بەشداریتان لەم بۆنەیە کە تایبەتە بە ڕاگەیاندنی ڕێنمایی کارگێڕی بۆ بارودۆخی پەناخوازان لە هەرێمی کوردستان.

چەندین ساڵە هەرێمی کوردستان، بێ هیچ جیاوازییەکی ئایینی و ڕەگەزی و نەتەوەیی، میوانداری سەدان هەزار پەناخواز و پەنابەری وڵاتانی دەوروبەر و هەروەها ئاوارەكانی ناوخۆی عێراق دەکات ، بە تایبەتی کە لەسەرەتای دەسپێکردنی هێرش و پەلاماری تیرۆریستانی داعش ، بە هەزاران کەس ڕوویان لە هەرێمی کوردستان کرد ، ئەوە لە کاتێکدا بوو کە لەو قۆناغەدا، ڕووبەڕووی بارودۆخێکی سەخت و قەیرانی داراییش بووینەوە، بەڵام سەرەڕای هەموو ئەو دۆخە سەختەش، حکومەتی هەرێمی کوردستان ئەرکی سەرەکی میوانداریکردنی دەیان کەمپی ئاوارە و پەنابەرانی لە ئەستۆ گرت و تا ئێستاش لە بەجێگەیاندنی ئەرکەکانی بەردەوامە و زۆربەی بارگرانییەکەش، لەسەر شانی حکومەتی هەرێمی کوردستان بووە.

ئەمڕۆ هەرێمی کوردستان بەردەوامە لە پاراستن و حەواندنەوەی هەزاران پەناخواز و ئاوارە و پەنابەر کە بە هۆی ترس و نەبوونی ئاسایش و ئارامی لە ناوچەکانیان هەڵاتوون و ڕوویان لە هەرێمی کوردستان کردووە و بەداخەوە تا ئێستا بارودۆخی وڵات و شوێنەکانیان ئاسایی نەبووەتەوە بۆ ئەوەی بگەڕێنەوە ، بێگومان کەس پێیخۆش نییە لە ئاوارەیی و پەنابەریدا بژی و حکومەتی هەرێمی کوردستانیش، هەمیشە لە گەڵ گەڕانەوەی ئارەزوومەندانەی هەموو ئاوارە و پەنابەرانە لە ڕێگەی ئاساییکردنەوەی بارودۆخی ناوچەکانیان بۆ ئەوەی بە سەربەرزی بگەڕێنەوە بۆ سەر ماڵ و شوێنەکانیان.

وەزارەتی ناوخۆی حکومەتی هەرێمی کوردستان، لە چوارچێوەی کارکردنیدا بۆ ڕێکخستنەوەی کاروباری پەناخوازان، ماوەیەکە بە هاوکاری کۆمسیاری باڵای نەتەوە یەکگرتووەکان بۆ کاروباری پەنابەران ( UNHCR ) خەریکی ئامادەکردن و داڕشتنی ڕێنمایی کارگێڕی بووە سەبارەت بە بارودۆخی پەناخوازان لە هەرێمی کوردستان.
ئەم ڕێنماییانە بەشێکە لە بەرنامەکانی حکومەتی هەرێمی کوردستان لە بواری کارگێڕی و یاسایی بە ئاراستەی پاراستنی مافەکانی پەناخوازان و پەنابەران و دیاریکردنی ئەرکەکانیان. بەتایبەتی لە بواری ڕێکخستن و یەکخستنی ڕێکارەکانی هاتن و پێشوازیکردن لە پەناخوازان و چەسپاندنی ماف و ئەرکەکانیان لە هەرێمی کوردستان.

دەستخۆشی لە وەزارەتی ناوخۆی حکومەتی هەرێمی کورستان و تیمی ئامادەکاری ئەم ڕێنماییانە دەکەم کە بە هاوکاری و هەماهەنگی لەگەڵ کۆمسیاری باڵای نەتەوە یەکگرتووەکان بۆ کاروباری پەنابەران ئەم ڕێنماییانەیان ئامادە کردووە.

لێرەدا دووپاتی دەکەینەوە کە هەرێمی کوردستان وەک هەمیشە بە نموونەیەکی گەشی میواندۆستی و پەناگەیەکی ئارام دەمێنێتەوە بۆ هەموو ئەوانەی لە ترسی زوڵم و ستەم و تیرۆر و تۆقاندن و چەوساندنەوە ڕووی تێدەکەن.

لێرە هەوڵمانداوە بە پێی توانای دارایی بەردەستمان، ئاوارە و پەنابەران و پەناخوازان سوودمەند بن له خزمەتگوزارییە گشتییە گرنگەکانی وەک خوێندن، چاودێری تەندروستی و ئاسایش و ئارامی و پێداویستییەکانی ژیانیان. هیوادارین حکومەتی فیدراڵ و کۆمەڵگەی نێودەوڵەتیش ، هاوکار و یارمەتیدەری هەرێمی كوردستان بن بۆ خزمەتی زیاتری ئەو پەناخواز و ئاوارە و پەنابەرانە تا ئەو کاتەی بارودۆخی وڵات و شوێنەکانیان یارمەتیدەر دەبێت بۆ ئەوەی بە سەربەرزی بگەڕێنەوە بۆ شوێنەکانیان.

ئیتر هەر شاد و سەرکەوتوو بن


PM:03:53:10/07/2024


ئه‌م بابه‌ته 328 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت