پوتن گه‌یشته كۆریای باكوور
وێستگه‌نیوز-
سه‌رۆكی روسیا به سه‌ردانێكی فه‌رمی گه‌یشته كۆریای باكوور و له‌لایه‌ن سه‌رۆكی ئه‌و وڵاته‌وه له فڕۆكه‌خانه پێشوازی لێكرا.
ئه‌مڕۆ سێشه‌ممه 18ی حوزه‌یرانی 2024، ڤلادیمێر پوتن، سه‌رۆكی روسیا به سه‌ردانێكی نێوده‌وڵه‌تی گه‌یشته وڵاتی كۆریای باكوور.
كۆشكی سه‌رۆكایه‌تی روسیا "كریملین" له راگه‌یه‌ندراوێكدا ئاماژه‌ی به‌وه‌دا كه "ڤلادیمێر پوتن گه‌یشته پیۆنگیانگ، پایته‌ختی كۆماری گه‌لی دیموكراتی كۆریای باكوور”.
به‌گوێره‌ی گرته‌یه‌كی ڤیدیۆییش كه كه‌ناڵی روسیا ئه‌لیه‌وم بڵاویكردووه‌ته‌وه، پوتن له فڕۆكه‌خانه له‌لایه‌ن كیم جۆنگ ئون سه‌رۆكی كۆریای باكووره‌وه پێشوازی لێكرا.
چاوه‌ڕوان ده‌كرێت پوتن له‌گه‌ڵ كیم جۆنگ ئون كۆببێته‌وه و له گفتووگۆكانیاندا تیشك بخرێته سه‌ر فراوانكردنی هاریكارییه سه‌ربازییه‌كانیان.
سه‌ردانه‌كه‌ی پوتن له كاتێكدایه كه نیگه‌رانییه نێوده‌وڵه‌تییه‌كان له زیادبووندان سه‌باره‌ت به ڕێكه‌وتنی چه‌ك كه تیایدا پیۆنگ یانگ ته‌قه‌مه‌نی زۆر پێویست ده‌دات به مۆسكۆ بۆ شه‌ڕ له دژی ئۆكرانیا له به‌رامبه‌ر هاوكاری ئابووری و گواستنه‌وه‌ی ته‌كنه‌لۆژیا كه مه‌ترسییه‌كانی چه‌كی ئه‌تۆمی و به‌رنامه‌ی مووشه‌كی كیم زیاتر ده‌كات.
هاوكارییه سه‌ربازی و ئابووری و هاوكارییه‌كانی دیكه‌ی نێوان كۆریای باكوور و روسیا به شێوه‌یه‌كی به‌رچاو زیادی كردووه له‌و كاته‌وه‌ی كیم له مانگی نۆی ڕابردوودا سه‌ردانی رۆژهه‌ڵاتی دووری روسیای كرد و له‌گه‌ڵ پوتن كۆبووه‌وه، ئه‌مه‌ش یه‌كه‌م كۆبوونه‌وه‌یان بوو له ساڵی 2019ه‌وه.
به‌رپرسانی ئه‌مریكا و كۆریای باشوور، كۆریای باكووریان تۆمه‌تبار كردووه به‌وه‌ی كه تۆپ و مووشه‌ك و ئامێری سه‌ربازی دیكه‌ی بۆ روسیا دابین كردووه بۆ یارمه‌تیدانی درێژكردنه‌وه‌ی شه‌ڕه‌كانی له ئۆكرانیا، له به‌رامبه‌ر ته‌كنه‌لۆژیا و یارمه‌تییه سه‌ربازییه سه‌ره‌كییه‌كاندا.
پیۆنگ یانگ و مۆسكۆ تۆمه‌ته‌كانیان سه‌باره‌ت به گواستنه‌وه‌ی چه‌كی كۆریای باكوور ڕه‌تكرده‌وه، كه ئه‌مه‌ش پێشێلكردنی بڕیاره‌كانی ئه‌نجومه‌نی ئاسایشی نه‌ته‌وه یه‌كگرتووه‌كانه.
بۆ بینینی ڤیدیۆ كلیك لێره بكه:
PM:10:02:18/06/2024
ئه‌م بابه‌ته 1060
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت