خه‌ڵاتی هێلدا دۆمین به‌ به‌خیتار عه‌لی به‌خشرا

‌به‌ختیار عه‌لی له‌كاتی وه‌رگرتنی خه‌ڵاته‌كه‌

وێستگه‌ نیوزـ

بەھای خەڵاتی (هێلدا دۆمین) 15 ھەزار یۆرۆیە جگە لە بەھا مەعنەوییەکەی. بەو نوسەرە بێگانانە دەدرێت، کە بەرھەمەکانیان بە زمانی ئەڵمانیی بڵاوکردوەتەوە و لە تاراوگه‌ دەژین، دوێنێ سێشه‌ممه‌ نوسەری دیاری کورد (بەختیار عەلی) لە مەراسیمێکدا لە (راتهاوس)ی شاری هایدلبێرگ له‌ ئه‌ڵمانیا بە ئامادەبونی دەستەبژێرێک لە میوانان و ئەدەبدۆستان، خەڵاته‌كه‌ی بۆ ساڵی 2023 پێبەخشرا.

د. هێرش ره‌سوڵ، له‌ لاپه‌ڕ‌ی خۆی له‌ تۆڕی فه‌یسبوك زانیاریی له‌سه‌ر وه‌رگرتنی خه‌ڵاته‌كه‌ له‌لایه‌ن به‌ختیار عه‌لی بڵاوكردوه‌ته‌وه‌و وێنه‌كانیشی لێوه‌رگرتوه‌ و نوسیویه‌تی: "ئەوەی گرنگە رێکخەرانی خەڵاتەکە (بەختیار عەلی)ـان وەک خەڵکی (ھەرێمی کوردستان) ناساندوەو دەستەی سوێندخواردن و دابەشکەرانی خەڵاتەکەش لە بەیاننامەکەیدا لە مانگی تشرینی دوەمی 2023 رونیکردەوە، لە دنیایەکی پڕ لە تەنگژە و شەڕدا، ئەدەبیاتەکەی (بەختیار عەلی) بە نمونەیەکی بەرزی مرۆڤانە دادەنرێت، هاوكات وەک "گێڕەرەوەیەکی بەھێز و بەتوانا" وەسفی (بەختیار عەلی) دەکەن، کە شەڕ و توندوتیژیی و ھەزاران کوشتنی کردوە بە چیرۆکی زیندوو".

لیژنەی دادوەرانی خەڵاتی (هێلدا دۆمین) لە راگەیەنراوی پێبەخشینی خەڵاتەکە، بۆ (بەختیار عەلی) نوسیویانە: "نوسین و کارە ئەدەبییەکانی بەختیار عەلی لە جیهانێکی پڕ لە تەنگژە و جەنگدا ئاوڕیان لە مرۆڤایەتیی داوەتەوە، رۆمانەکانی چیرۆکگەلی گەورەی هاوڕێیەتیی و ناپاکیی و ئازارن، چیرۆکی گەڕان بە دوای راستیی و ئاشتبونەوەن بەبێ تۆڵەسەندنەوە، ئەدەبیاتێکی جیهانیی پڕ لە جادوی هەیە، بەبێ چاوپۆشین لە قێزەونییەکانی جەنگ".

له‌به‌رامبه‌ریشدا بەختیار عەلی له‌سه‌ر وه‌رگرتنی خه‌ڵاته‌كه‌ ده‌ڵێت: "خەڵاتەکە بە موڵکی ئەدەبیاتی بێناز و بێخزمەتی کورد

دەزانم، ئەدەبیاتێک زوڵم و ستەم نەیهێشتوە بناسرێت، شکاندنی ئەو دیوارە کە بە دەوری زمان و ئەدەبی کوردیدا هەڵچنراوە ئاسان نییە، من لەو ساڵانەدا چیم بۆ کرابێت و لە دەست و توانامدا بووبێت کردومە، خۆشبەختم ببینم ئەدەبی کوردیی سنورەکان دەبڕێت و دیوارەکان دەشکێنێت. بەڵام ئەوەیە دوای هەمو رێزلێنانێکی وا بە بەها ئەرکەکان سەختتر دەبن".

PM:10:57:13/03/2024