11 بارمته‌ی ئیسرائیلی راده‌ستی خاچی سوور كران و حه‌ماسیش چاوه‌ڕانی ئازادكردنی 33 به‌ندكراوه‌


وێستگه‌ نیوزـ

رۆژی چوارەمی ئاگربەستی نێوان حەماس و ئیسرائیل ئەمڕۆ دووشه‌ممه‌ كۆتایی دێت، به‌ڵام وه‌ك راگه‌یه‌ندرا دوو رۆژی دیكه‌ ئاگربه‌سته‌كه‌ درێژ ده‌كرێته‌وه‌و له‌وماوه‌یه‌دا 39 ئیسرائیلی و 117 فەلەستینی لەلایەن هەردوولاوە ئازادکراون.

هه‌ر ئه‌مشه‌و حكومه‌تی ئیسرائیل رایگه‌یاند: بزووتنه‌وه‌ی حەماس 11 بارمتەی ئیسرائیلی رادەستی خاچی سووری نێودەوڵەتی کردووە و حەماسیش چاوه‌ڕوانه‌ هه‌رئەمشەو 33 بەندکراوی فەلەستینی ئازاد بکرێن.

بەوتەی به‌رپرسانی بزووتنه‌وه‌ی حەماس، ئەو 33 بەندکراوە، 30 کەسیان منداڵن و سیانەکەی دیکەش ژنن، به‌ڵام ئیسرائیل ناسنامەی 11 بارمتەکەی خۆی ئاشكرا نه‌كردوه‌.

ئه‌وه‌ش له‌كاتێكدایه‌ كه‌ ئه‌مڕۆ ماجد بن محه‌مه‌د ئه‌نساری، وته‌بێژی وه‌زاره‌تی ده‌ره‌وه‌ی قه‌ته‌ر ئێواره‌ی ئه‌مڕۆ دووشه‌ممه‌ له‌ به‌یاننامه‌یه‌كدا رایگه‌یاند: له‌چوارچێوه‌ی نێوه‌ندگیریی به‌رده‌وام له‌نێوان ئیسرائیل و بزووتنه‌وه‌ی حه‌ماس، گه‌یشتینه‌ رێككه‌وتن بۆ درێژكردنه‌وه‌ی ئاگربه‌ستی بۆ دوو رۆژی دیكه‌ له‌ كه‌رتی غه‌ززه‌.

هاوكات بزووتنه‌وه‌ی حه‌ماس درێژكردنه‌وه‌ی ئاگربه‌سته‌كه‌ی پشتڕاستكرده‌وه‌و رایگه‌یاند دوای گفتوگۆكردنیان له‌گه‌ڵ به‌رپرسانی میسر و قه‌ته‌ر، رێككه‌وتون به‌ هه‌مان مه‌رجه‌كانی ئاگربه‌ستی پێشوو، دوو رۆژی دیكه‌ ئاگربه‌سته‌كه‌ درێژ بكه‌نه‌وه‌.


PM:09:42:27/11/2023


ئه‌م بابه‌ته 1468 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت