ئه‌ردۆغان یه‌ك هه‌فته‌ ماته‌مینیی له‌ سه‌رتاسه‌ری توركیا راگه‌یاند


وێستگه‌ نیوزـ

سەرۆک كۆماری تورکیا 7 ڕۆژ ماتەمینی نیشتمانیی بەهۆی ئەو بوومەلەرزانەوه‌ راگه‌یاند كه‌ به‌ره‌به‌یان و دوانیوه‌ڕۆی ئه‌مرۆِ دووشه‌ممه‌ وڵاته‌كه‌ی هه‌ژاند.

بۆ بومه‌له‌رزه‌كانی ئه‌مڕۆی توركیا، ره‌جه‌ب ته‌یب ئه‌ردۆغان، سه‌رۆك كۆماری ئه‌و وڵاته‌ ماته‌مینیی نیشتمانیی راگه‌یاند و بڕیاریدا 7 رۆژ له‌ سه‌رتاسه‌ری توركیا ماته‌مینی بگێڕدرێت.

هاوكات فەخرەدین کۆجا، وەزیری تەندروستیی تورکیا ئاماری نوێی گیانلەدەستدان و بریندارانی بومەلەرزەکەی راگەیاند و وتی، تائێستا 1651 کەس گیانیان لەدەستداوە و 11 هەزار و 119 کەسیش برینداربوون. 

خولوسی ئاکار، وەزیری بەرگریی تورکیاش ئاماژەی بەوەکرد، لە رێگەی سوپاوە هەوڵی دابینکردنی پێداویستییەکان دەدەن و لە زۆربەی ناوچەکان بە هەزاران سەرباز بۆ پێشکێشکردنی هاوکارییەکان ئامادەن.  

سه‌باره‌ت به‌ زیانه‌كانی سوریا وه‌زاره‌تی ته‌ندرووستی ئه‌و وڵاته‌ش ئاماری قوربانییانی بوومه‌له‌رزه‌كه‌ی به‌ره‌به‌یانی ئه‌مڕۆی بڵاوكرده‌وه‌و رایگه‌یاند، زیاتر له‌ هه‌زار كه‌س گیانیان له‌ده‌ستداوه‌ و 2400ی دیكه‌ش بریندارن.

بەرەبەیانیی ئه‌مڕۆ دووشەممە، بەڕێوەبەرایەتیی کارەسات و باری لەناکاوی تورکیا ناسراو بە ئافاد بڵاویکردەوە، بومەلەرزەیەک بە گوڕی 7.7 پلەی رێختەر شاری مەرەشی باکووری کوردستانی هەژاند. بومەلەرزەکە زۆربەی ناوچەکەی گرتەوە.

بومەلەرزەکە کاریگەری گەورەی لەسەر رۆژئاوای کوردستان و سوریاش هەبووه‌و له‌وێش چه‌ند بومه‌له‌رزه‌یه‌ك رویاندا و زیانی گیانی و ماددیی به‌دوای خۆیدا هێنا.


PM:08:54:06/02/2023


ئه‌م بابه‌ته 1160 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت