عه‌بادی پشتیوانی له‌ په‌یامه‌كه‌ی سه‌در ده‌كات

‌حه‌یده‌ر عه‌بادی

وێستگه‌نیوزـ

دوای ئه‌وه‌ی موقته‌دا سه‌در، رێبه‌ری ره‌وتی سه‌در، ئه‌مشه‌و وتارێكی له‌باره‌ی دۆخی سیاسی عیراق پێشكه‌شكرد، سه‌رۆكی هاوپه‌یمانی نه‌سر پێشوازی له‌ په‌یامه‌كانی كرد و هه‌نگاوه‌كانی سه‌دریشی به‌رز نرخاند.


له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی تویته‌ر، حه‌یده‌ر عه‌بادی، سه‌رۆكی هاوپه‌یمانی نه‌سر وتی: "پێشوازی له‌ وتاره‌كه‌ی موقته‌دا سه‌در ده‌كه‌م، كه‌ له‌گه‌ڵ ده‌ستپێشخه‌رییه‌كانمان یه‌كده‌گرێته‌وه‌".

عه‌بادی هه‌روه‌ها نووسیویه‌تی: "هه‌نگاوه‌كانی موقته‌دا سه‌در له‌پێناو پاراستنی خوێنی عیراقییه‌كان و چاكسازی، به‌رز ده‌نرخێنم".

وتیشی: "داوا له‌هه‌موو لایه‌ك ده‌كه‌م، ده‌ست له‌ناو ده‌ست خزمه‌تی گه‌ل و پڕۆسه‌ی چاكسازی بكه‌ن، هه‌روه‌ها له‌ رێگه‌ی پرۆسه‌یه‌كی ئاشتیانه‌ و دیموكراتی، پشتیوانی له‌ وڵاتی ده‌ستوور بكه‌ن".

موقته‌دا سه‌در، رێبه‌ری ره‌وتی سه‌در، ئه‌مشه‌و په‌یامێكی ئاراسته‌ی مانگرتووانی ره‌وته‌كه‌ی و لایه‌نه‌ سیاسییه‌كانی عێراق كرد، تیایدا رایگه‌یاند، ئه‌مه‌ی ئێستا رووده‌دات، ململانێیه‌ له‌ سه‌ر ده‌سه‌ڵات.

سه‌در وتیشی: "گفتوگۆمان له‌گه‌ڵیان تاقیكرده‌وه‌، بینیمان وڵات چی لێهات،  وێرانكاری به‌دوادا هات، دوای ئه‌وه‌ی گه‌ل قسه‌ی خۆی كرد، گفتوگۆ له‌گه‌ڵ ئه‌وانه‌ سوودیان نابێت".

سه‌در داوای هه‌ڵوه‌شاندنه‌وه‌ی په‌رله‌مان و ئه‌نجامدانی هه‌ڵبژاردنی پێشوه‌خته‌ی كرد له‌ عیراق.


PM:10:50:03/08/2022


ئه‌م بابه‌ته 640 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت