لەیاری نێوان یانه‌ی هه‌ولێر و شوڕته‌ شەڕ روویدا و چوار کەس برینداربوون



وێستگەنیوز-

ئێوارەی ئەمڕۆ شەممە دوای کۆتاییهاتنی یاری نێوان یانەی هەولێر و شوڕته‌  لە یاریگای شەهید فڕه‌نسۆ هەریری، شەڕ لەنێوان هاندەرانی هەردوو یانە "بەهۆی ئاڵاوە" روویدا و بەهۆیەوە چوار کەس برینداربوون، لای خۆیەوە یانەی هەولێر رایگەیاند، "گرژییەکان بەهۆی ئەوەبووهاندەرانی یانەی شوڕتە بەرگەی شکستی یارییەکەیان نەگرت و هەستاون بە شکاندنی کورسی یاریگاکە".

بەگوێرەی زانیارییەکان هۆکاری شەڕی نێوان هاندەرانی یانەی هەولێر و شوڕتە پەیوەندی بە هەڵکردنی ئاڵاوە هەبووە، شاهێدحاڵەکانی رووداوەکە دەڵێن، بەشێک لە هاندەرانی یانەی شوڕتە ئاڵای عێراقیان بەرزکردووەتەوە و لایەنگرانی یانەی هەولێریش داوایان کردووە ئاڵاکە بهێننەخوارەوە، بەوهۆیەش گرژی دروستبووە.

هەرچەندە دوای رووداوەکە هێزە ئەمنییەکان گەیشتوونەتە شوێنی رووداوەکە و گرژییەکانیان کۆنتڕۆڵکردوە، بەڵام تائێستا پۆلیسی هەولێر لەبارەی رووداوەکە هیچ زانیارییەکانی بڵاونەکردووەتەوە.

ئێوارەی ئەمڕۆ له‌یاریگای نێوده‌وڵه‌تی شه‌هید فرانسۆ هه‌ریری یاری نێوان یانه‌ی ھه‌ولێر و یانه‌ی شورته‌، له‌خولی جامی عێراق ئه‌نجامدرا. دوای یاریه‌كی به‌هێز له‌نێوان هه‌ردوو یانه‌، یانه‌ی هه‌ولێر توانی بگاته‌ قۆناغی هه‌شت دوای بردنه‌وه‌ی له‌ یانەی شورته‌ به‌لێدانی یه‌كلاكه‌ره‌وه‌ به‌ 4-2.

لای خۆیەوە یانەی هەولێر لەراگەیەنراوێکدا باسی لەوەکردوە، "دوای سەرکەوتنی یانەی هەولێر لە یاری ئەمڕۆ بەرامبەر بە یانەی شوڕتە لە قۆناخی 16ـی جامی عێڕاق، لەگەڵ ئەوەی ئێمە وەک یانەی هەولێر و دەستەی هاندەرانمان بە جوانترین شێوە لە پێشوازییان بووین، بەڵام بەداخەوە هاندەرانی یانەی میوان بەرگەی دۆڕانەکەیان نەگرت و لە خۆشی هاندەرانی یانەی هەولێریان کەمکردەوە و، هەڵسان بە شکاندنی ژمارەیەکی زۆر لە کورسییەکی یاریگەی فڕەنسۆ هەریری."

ئاماژەی بەوەشکردوە، "بەداخەوە هەندێک لە راگەیاندنکاران و جەماوەری یانەی شوڕتە، دەیانەوێ بابەتەکە بەلارێدا ببەن گوایە ئاڵای عێڕاق لە یاریگە دڕاوە، ئێمە وەک یانەی هەولێر بە هەموو شێوەیەک ئەو تۆمەتانە ڕەت دەکەینەوە و ئەمە زۆر دوورە لە راستی."


PM:10:10:04/12/2021


ئه‌م بابه‌ته 960 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت