لەسه‌ر كوژرانی عه‌قید موراد كانی كورده‌یی
رونکردنەوەیەکی به‌په‌له‌ ئەنجومەنی ئاسایشی ھەرێمی کوردستانەوە


وێستگه‌ نیوزـ

ئێواره‌ ئه‌مڕۆ عه‌قید موراد كانی كورده‌یی، ئه‌فسه‌ری نزیك له‌ لاهور شێخ جه‌نگی، هاوسه‌رۆكی یه‌كێتیی نیشتمانیی كوردستان  له‌ قه‌زای رانیه‌ له‌ روبه‌ڕوبونه‌وه‌یه‌كدا كوژرا، ئەنجومەنی ئاسایشی ھەرێمی کوردستان رونكردنه‌وه‌یه‌كی له‌سه‌ر روداوه‌كه‌ بڵاوكرده‌وه‌ و ده‌ڵێت كه‌ ناوبراو "داواكراو" بووه‌ و به‌ بڕیاری دادا هێزێك ویستویه‌تی ده‌ستگیری بكات.

ئەنجومەنی ئاسایشی ھەرێمی کوردستان له‌ رونكردنه‌وه‌كه‌یدا رایگه‌یاندوه‌: "سەرلەئێوارەی ئەمڕۆ ٢٥ی ١١ی ٢٠٢١ ھێزێکی فەرمی بۆ جێبەجێکردنی بڕیاری دادگا و سەروەریی یاسا بۆ دەستگیرکردنی داواکراو (موراد کانی کوردەیی) لە شاری رانیە بەشێوەیەکی مەدەنی و یاسایی ئەرکی دەستگیرکردنی ناوبراویان پێسپێردرا".

رونیشی كردوه‌ته‌وه‌ "لەکاتی جێبەجێکردنی بڕیارەکە موراد کانی کوردەیی و پاسەوانەکانی کە لەگەڵیدا بوون رووبەڕووی ھێزەکە دەبنەوە کە لەکاتی ئەرکدا بوون بۆ جێبەجێکردنی سەروەری یاسا، کارمەندێکی ئەمنی بە ناوی (شامل زرار ئیسماعیل) شەھید دەکەن و سێ کەسی تریش بریندار دەکەن."

به‌پێی رونكردنه‌وه‌كه‌ی ئه‌نجومه‌نی ئاسایشیس هه‌رێم "لەئەنجامی وەڵام و دەستپێشخەری یاساشکێنان و ھەڵھاتوان موراد کانی کوردەیی و دوو لە پاسەوانەکانی دەکوژرێن."

جه‌ختیشی كردوه‌ته‌وه‌ كه‌ "دەزگا ئەمنییەکان بەدواداچوون دەکەن بۆ دەستگیرکردنی ھەموو ئەو تۆمەتبارانەی پەیوەستن بەم رووداوەوە و لەدادگا ھەڵھاتوون و سەرجەم تۆمەتباران راپێچی بەردەم دەسەڵاتی دادوەری دەکرێن".


PM:11:18:25/11/2021


ئه‌م بابه‌ته 29908 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

هەواڵی پەیوەندیدار

زۆرترین خوێندراو