بریکارى وه‌زاره‌تى شه‌هیدان: سه‌رجه‌م دۆسیه‌ى شه‌هیدان ده‌گوازرێنه‌وه‌ بۆ وه‌زاره‌تى کاروبارى شه‌هیدان و ئه‌نفالکراوان

‌به‌ره‌ڤان حه‌مدى بریکارى وه‌زاره‌تى شه‌هیدان و ئه‌نفالکراوانى حکوومه‌تى هه‌رێم

وێستگە نیوز- 

بریکارى وه‌زاره‌تى شه‌هیدان و ئه‌نفالکراوانى حکوومه‌تى هه‌رێم ڕایگەیاند، سه‌رجه‌م دۆسیه‌ى شه‌هیدان ده‌گوازرێنه‌وه‌ بۆ وه‌زاره‌تى کاروبارى شه‌هیدان و ئه‌نفالکراوان و   پاش وردبینی لایه‌نى جوگرافى له‌سه‌ر ئاستى پارێزگا و بانکه‌کانیان و ڕاسپارده‌بوونى شایسته‌کانیان به‌پێى ماف و ئیمتیازاتى ته‌واوى شایسته‌کانیان بۆ ده‌خرێته‌ بوارى جێبه‌جێکردنەوە. 

ئەمڕۆ پێنجشەممە، به‌ره‌ڤان حه‌مدى بریکارى وه‌زاره‌تى شه‌هیدان و ئه‌نفالکراوانى حکوومه‌تى هه‌رێم، به‌ ماڵپه‌ڕى پارتى ڕاگه‌یاندووە "گواستنه‌وه‌ى دۆسیه‌ى شه‌هیدان بۆ وه‌زاره‌تى کاروبارى شه‌هیدان به‌پێى ڕێنماییى ژماره‌ 5 له‌ چوارچێوه‌ و په‌یڕه‌و و یاسای چاکسازیى حکوومه‌تى هه‌رێمى کوردستاندا وه‌ک قۆناغى یه‌که‌م  1018 دۆسیه‌ى شه‌هیدانى شه‌ڕى داعش له‌ وه‌زاره‌تى کاروبارى پێشمه‌رگه‌وه‌ گواسترا‌وه‌ بۆ وه‌زاره‌تى کاروبارى شه‌هیدان و ئه‌نفالکراوان، ئه‌م دۆسیانه‌ پاش وردبینیى لایه‌نى جوگرافى له‌سه‌ر ئاستى پارێزگا و بانکه‌کانیان و ڕاسپارده‌بوونى شایسته‌کانیان به‌پێى ماف و ئیمتیازاتى یاساى ژماره‌ 9ی که‌سوکارى شه‌هیدان ته‌واوى شایسته‌کانیان بۆ ده‌خرێته‌ بوارى جێبه‌جێکردنەوە".

باسیلەوەشکردووە، ''له‌گه‌ڵ وه‌زیرى ناوخۆى حکوومه‌تى هه‌رێم کۆ بووینه‌وه‌ بۆ ئه‌وه‌ى به‌ یه‌که‌وه‌ و به ‌هه‌ماهه‌نگى و به‌ هه‌مان شێوه‌ کار بکرێت بۆ گواستنه‌وه‌ى دۆسیه‌ی کارمه‌ندانى هێزى ناوخۆ و شه‌هیدانى زێره‌ڤانى و شه‌هیدانى هێزه‌کانى ناوخۆ و پاسه‌وانانى سنوور و ڕێنمایى و ڕێکارى په‌یڕه‌وییانه‌ بگیرێته‌ به‌ر بۆ گواستنه‌وه‌ى ته‌واوى دۆسیه‌کانیان بۆ وه‌زاره‌تى شه‌هیدان و ئه‌نفالکراوان".

ئاماژەی بۆ ئەوەشکردووە، ''ئامانج له‌م پرۆسه‌یه‌ به ‌پله‌ى یه‌ک بۆ ڕێکخستنه‌وه‌ و یه‌کخستنه‌وه‌ى دۆسیه‌ى شه‌هیدان و کۆکردنه‌وه‌یانە له‌ وه‌زاره‌تى شه‌هیدان، پاشان کار دەکەین بۆ ده‌رکردنى یاسایه‌کى گشتگیر بۆ سه‌رجه‌م شه‌هیدانى هه‌رێمى کوردستان و چاکسازیکردن له‌ ته‌واوى دۆسیه‌ى شه‌هیدان له‌ به‌ڕێوەبه‌رایه‌تییه‌ گشتییه‌کانى دیکه‌ى حکوومه‌ت".


PM:12:03:25/11/2021


ئه‌م بابه‌ته 204 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت