لە بەهاری ئەمساڵەوە تا ئێستا نزیکەی 10 هەزار کچی منداڵ لە ئێران بەشوودراون
فۆتۆ: گێتی
وێستگه نیوز ـ
بەپێی ئامارێکی ئاژانسی ئیسنا-ی ئێرانی، لە بەهاری ئەمساڵەوە تا ئێستا نزیکەی 10 هەزار کچی تەمەن 10 بۆ 12 ساڵ لەلایەن خانەوادەكانیانەوە بەشوودراون.
ئاماری ئاژانسەکە نیشانی دەدات، لەماوەی نزیكەی نۆ مانگی سەرەتای ساڵی هەتاوی، نۆ هەزار و 753 کچی منداڵ لەلایەن کەسوکاریانەوە بەشوودراون، لە کاتێکدا ئەو کچانە تەمەنی یاساییان بۆ هاوسەرگیری تەواونەکردووە و لەنێوان 10 تا 12 ساڵدا بوون.
بەپێی ئامارەکە، ئەو رێژەیە بەراود بە ساڵانی رابردوو 33% بەرزبووتەوە و لە چەند ساڵی رابردووی ئێراندا هاوشێوەی نەبووە.
ئاژانسی ئیسنا ئەوەشی ئاشکراکردووە، ئەو کچانەی تەمەنیان لەنێوان 15 بۆ 19 ساڵدا بووە و شوویانکردووە، لەماوەی ئەو چەند مانگەدا ژمارەیەن 45 هەزار و 522 کچ بووە.
ئامارەکانی ئاژانسەکە تەنها ئەو هاوسەرگیرییانە دەگرێتەوە کە لە فەرمانگەکانی سەر بە پارێزگاکان تۆمارکراون، بەپێی دابونەریتی چەندین ناوچەی ئێران، سەدان بەشوودانی دیکە هەن، کە لە فەرمانگەکاندا تۆمارناکرێن و لەلایەن مامۆستای ئایینی ناوچەی خۆیانەوە کاری مارەبڕینەکەیان بۆدەکرێت.
ئەو تەمەنەی بەپێی یاساکانی ئێران دانراوە بۆ هاوسەرگیریی کچان، لە تەمەنی 13 ساڵیدا دەتوانن شوبکەن و کوڕانیش لە تەمەنی 15 ساڵیدا دەتوانن هاوسەرگیری بكەن.
ئەگەرچی تەمەنی 13 ساڵی بۆ شوکردنی کچان دانراوە، بەڵام یاساکان ناڕاستەوخۆ هاوکاری دەکەن، ئەگەر کچێک 9 ساڵی تێپەڕاندبێت، بە ڕەزامەندیی کەسوکاری کچ و کوڕەکە هاوسەرگیرییەکە ئەنجامبدرێت.
PM:01:34:22/11/2021
ئه‌م بابه‌ته 1096
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت