محەمەد دوشیوانی بۆ وێستگە نیوز: کوڕەکەم بەدەست و قاچی بەستراو ناردە زیندان

وێستگە نیوز_ ژووری هەواڵ

محەمەد دوشیوانی، باوکی ئەو گەنجەی تۆمەتبارە بە کوژرانی کارمەندێکی سکویرتی، دەڵێت، "کوڕەکەی بەمەبەستی دابینکردنی جێگەی مانەوە بۆ شاندێک لە ماڵەوە چۆتە دەرەوەی کۆمەڵگەی دەروازە ستی و رووداوەکە روویداوە"، دەشڵێت، "ئەمشەو کوڕەکەی رادەستی یاسا کردووە".

محەمەد دوشیوانی، ئەندامی سەرکردایەتی یەکێتی و لێپرسراوی مەڵبەندی کەرکوکی یەکێتی دەربارەی رووداوەکە لە لێدوانێکی تایبەتدا بە وێستگە نیوز_ی وت، "شاندێک لە کەرکوک بوون هاتوونەتە سلێمانی بۆ مانەوە کوڕەکەم ویستوویەتی بچێت جێگەی مانەوەیان بۆ دابین بکات، لە کاتێکدا خۆی لە خەودا بووە و هەستاوە و چۆتە دەرەوە، بەڵام ئەم رووداوەی بەسەردا هاتووە".

دەشڵێت، "لەوەتی رووداوەکە روویداوە کوڕەکەم، هەڵاتووە بە خۆمان و خزم و کەسوکار سەرقاڵی دۆزینەوەی بووین و ئەمرۆ توانیومانە بیدۆزینەوە و تەلەفۆنم بۆ بنەماڵەی کوژراوکە کردووە کە بەدەست و قاچی بەستراوەوە کوڕەکەمتان بۆ دەهێنم، بەڵام ئەوان قبوڵیان نەبووە و داویانکردووە بدرێتە دادگا، هەربۆیە ئەمشەو کوڕەکەم لەلایەن دەزگا ئەمنییەکانەوە دەستگیرکراوە و ئێستا لە زیندانە".

ئاماژە بەوەشدەکات، "چاوەروانی ئەوەین، یاسا و دادگا سەروەر بێت و رۆڵی خۆی ببینێت". دەشڵێت، "دادگا بە خوێنی خۆمان و ڕەفیقەکانمان بنیادمان ناوە، خۆمان لەخەڵک زیاتر پابەند بڕیارەکانی دەبین".

دەشڵێت، "زۆر بەداخم بۆ ئەو ماڵەی کە بوونەتە قوربانی رووداوەکە و دۆستی خۆمانن و خزمی خۆمانن و یەک عەشرەتین". ئاماژە بەوەشدەکات،"خۆزگە کوڕەکەی من بکوژرایە و ئەوەی ئەوانی هیچی لێ نەهاتەیە"، بەداخەوە لێرە و لەوێ گوێمان لە هەندێک قسە دەبێت کە زیاتر ناخمان بریندار دەکات، ئەم رووداوە یەکەم رووداو و کۆتا رووداو نابن گوناحە یەکسەر بوترێ کوڕی مەسولە و رووداوی دیکە روودەدەن کەس باسی ناکات".

هاوکات ئەمرۆ پێنجشەممە، لە ڕاگەیەندراوێکدا، نوسینگەی لیوا چەتۆ ساڵح بریکاری وەزارەتی ناوخۆی حکومەتی هەرێمی کوردستان، ئاماژە بەوەکرد، "‎سەبارەت بە ڕوداوەکەی شەوی ڕابردوو کە بووە ھۆی كوشتنی (ه.م .ك) کە لە دایكبووی ساڵی 1990 یە و دانیشتووی گەڕەكی شەكرەكەیە لە سلێمانی و كارمەندی سکویرتی دەروازە سیتی بووە، بکوژی تاوانبار کەسێکی ناسراوە و ناو و ناونیشانی زانراوە".

ئەوەشیخستەڕوو، "لە دوای ڕووداوەكەوە هێزە ئەمنییەكانمان لە هەوڵی دەستگیركردنی تاوانبار و بكوژەكەدان تا ڕاپێچی بەردەم یاسای دەكەین و لەكاتی دەستگیركردنی تاوانبارەكەدا وردەكاری و زیاتر دەخەینە ڕوو"، لەلایەکی دیکەوە ئاسایشی سلێمانی سەرەڕای پشتڕاستکردنەوە و دەستگیرکردنی تۆماتباری رووداوەکە، ئاماژە بەوەشدەکات، "تاوانبار كوڕی بە‌رپرسێكی شاری كە‌ركوكە‌ و بە‌سوپاسە‌‌وە‌ كە‌سوكارە‌كە‌شی ھاوكار بوون لە‌ دە‌ستگیركردنی".

PM:07:00:14/10/2021

ئه‌م بابه‌ته 54644 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت