رۆژنامەی ئەلسەباح: پەسەندکردنی یاسای نەوت و غاز دەکەوێتە دوای هەڵبژاردنی ئەنجومەنی پارێزگاکانی عێراق

وێستگەنیوزـ

رۆژنامەی (الصباح)ـی نیمچەفەرمیی، لە هەواڵێکی لاپەڕەی ژمارەی ئەمڕۆیدا ئاماژەی بەوە داوە یاسای نەوت و غاز کە یەکێکە لە گرنگترین یاساکانی عێراق و ماوەی 15 ساڵە دەهێنرێت و دەبرێت و هێشتاش مشتومڕ و ناکۆکییەکی زۆری لەسەرە؛ رەنگە دوای هەڵبژاردنی ئەنجوومەنی پارێزگاکانی عێراق کە لە کۆتایی ئەمساڵدا دەکرێت، لە پەرلەمانی عێراق تێپەڕێنرێت.

عەلی ئەلمەشکوور، ئەندامی لیژنەی نەوت و غازی پەرلەمانی عێڕاق، بە (ئەلسەباح)ـی راگەیاندووە یاسای نەوت و غاز پرسێکی گرنگی ناکۆکیی نێوان حکومەتی فیدراڵ و هەرێمە، کە بە وتەی ئەو هۆکارەکەشی ئەوەیە هەریەک لەو دوو حکومەتە لە گۆشەنیگای خۆیانەوە سەیری یاساکە دەکەن.

ئەلمەشکوور، روونی کردەوە 11 ماددە لە پرۆژە یاساکەدا کرۆکی ناکۆکیی نێوان حکومەتی هەرێم و ناوەندە، ئەو 11 ماددەیەش لەلایەن حکومەتی فیدراڵیەوە داڕێژراون و رۆحی یاساکە و گوزارشتکەرن لە ناوی یاساکە، هەر بۆیە کاتێکی زۆریان دەوێت تا رێککەوتنیان لەبارەوە دەکرێت.

ئەو پەرلەمانتارە بە رۆژنامەکەی وت: "یەکێک لە خاڵە ناکۆکەکان لە یاساکەدا، پێکهێنانی ئەنجومەنی باڵای نەوت و غازە، کە نوێنەری پارێزگا بەرهەمهێنەرەکان و هەروەها حکومەتی فیدراڵی و هەرێم لەخۆدەگرێت و سەرۆکەکەی وەزیری نەوتی حکوومەتی فیدراڵییە، ئەوەی کێشەی درووست کردووە ئەوەیە حکومەتی هەرێم دەیەوێت وەزیری نەوتی هەرێم هاوتای وەزیری نەوت بێت لەو ئەنجومەنەدا".

ئەلمەشکوور بە رۆژنامەکەشی راگەیاندووە کە ئەو پێشبینی دەکات دوای هەڵبژاردنەکانی ئەنجوومەنی پارێزگاکان لە ناوەڕاستی مانگی کانوونی دووەمی داهاتوو یاساکە بگاتە پەرلەمان و دەنگی لەسەر بدرێت، هەروەها دەشڵێت: "لە عێراقدا دوو دەوڵەت نییە، بەڵکو حکومەتێکی فیدراڵی و هەرێمێک هەیە، دەبێت یاساکە مەرکەزیی بێت بۆ ئەوەی مافی پارێزگا بەرهەمهێنەکان و هەرێمیش بپارێزێت و لیژنەکەمان ئامادەیە بۆ گفتوگۆی ئەو یاسایە هەرکاتێک بگاتە دەستمان".

رۆژنامەکە روونی کردوةتەوە ئەو رەشنووسەی پێشنیاز کراوە لە لایەن حکومەتی ناوەندەوە رێگە بە شێوازی گرێبەستی شەراکەت لەگەڵ کۆمپانیا بیانییەکانی نەوت دەدات کە گەرەنتی پێدانی قازانج بەو کۆمپانیایەش دەکات، هەر بە پێی ئەو رەشنووسە پێشنیازکراوەی حکومەتی ناوەند، داهاتی نەوتی بەدەستهاتوو لەسەر بنەمای بەشی تاکەکەس دابەش دەکرێت، هەروەها رێگە بە پارێزگاکانیش دەدات گرێبەستی گەڕان و بەرهەمهێنان لەگەڵ کۆمپانیاکان واژۆ بکەن.

کازم ئەلفەییاز، ئەندامی لیژنەی دارایی و ئابوری پەرلەمانی عێراق، لە لێدوانێکیدا بۆ رۆژنامە عێراقییەکە ئاماژەی بەوە کردووە "تێپەڕاندنی یاساکە بەشدار دەبێت لە گۆڕانکارییەکی چۆنایەتی لە ئابووریی عێراق و دەسەڵاتی زۆرتر دەدات بە حکومەتی فیدراڵی لەو پرسەدا ئەمە سەرباری ئەوەی رێخۆشکەرە بۆ دابەشکردنێکی دادپەروەرانەتری داهاتی نەوت لەنێوان پارێزگاکاندا".

ئەو پەرلەمانتارە روونیشیکردەوە، ئەگەر یاسای نەوت و غاز بە درووستی جێبەجێ بکرێت و بەپێی ئەوەی لەو رەشنووسەدا هاتووە، هاووڵاتییانی هەموو عێراق لێی سوودمەند دەبن، بەوپێیەی داهاتی نەوت بە شێوەیەکی دادپەروەرانە و یەکسان دابەشدەکرێت، ئاماژەی بەوەشکرد، پارێزگا بەرهەمهێنەرەکان کە کاریگەر دەبن بە لێکەوتەکانی دەرهێنانی نەوت ئەوانیش سوودمەند دەبن و حکومەتی فیدراڵییش دەسەڵاتی زیاتری دەبێت لە گرێبەستکردن لەگەڵ کۆمپانیاکان و رۆتینی گرێبەستکردن لەگەڵ کۆمپانیاکان کەم دەبنەوە، هەروەها دۆسێی دەرهێنان و هەناردەکردنی نەوتیش کۆنترۆڵ دەکرێت.

ئەلفەیاز جەختی لەوە کردەوە کە یاسا پێشنیازکراوەکە نایاب و ناوازەیە و داوا دەکات دەکات دوور لە فشاری سیاسی یان دەستوەردانی دەرەکی و ناوخۆیی و بە لەبەرچاوگرتنی بەرژەوەندی گشتی پەسەند بکرێت.

AM:09:29:21/09/2023

ئه‌م بابه‌ته 1816 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت