سەرۆکی کۆمیسیۆنی یەکێتیی ئەوروپا هاوخەمی بۆ سعوودیە دەربڕی

وێستگەنیوز-

سەرۆکی کۆمیسیۆنی یەکێتیی ئەورووپا، ئورسولا فون دێر لاین، پشتگیری و هاوخەمی تەواوی یەکێتیی ئەورووپای بۆ عەرەبستانی سعوودیە راگەیاند، بەهۆی پەلاماردانی فڕۆکەخانەی نێودەوڵەتیی شا خالید لە شاری ریاز.

سەرۆکی کۆمیسیۆنەکە ئاماژەی بەوەش کرد، بە ئامانجگرتنی ژێرخانی مەدەنی بە تەواوی ناپەسەند و قبووڵنەکراوە، هاوکات جەختی لەسەر پێویستیی راگرتنی کردەوە توندوتیژیەکانی گرووپ و چەکدارەکانی نزیک لە ئێران لە ناوچەکەدا کردەوە.

بەپێی راگەیەندراوی دەستەی فڕۆکەوانیی مەدەنیی سعوودیە، فڕۆکەخانەی نێودەوڵەتیی شا خالید رووبەڕووی دوو هێرش بووەوە، کە یەکەمیان دامەزراوەکانی فڕۆکەخانەکەی ئامانج گرتووە و دووەمیشیان راستەوخۆ بەر فڕۆکەیەکی هێڵی ئاسمانیی سعوودیە کەوت.

ئەم هێرشە بووە هۆی کوژرانی سێ هاووڵاتیی سعوودیە و برینداربوونی ژمارەیەک هاووڵاتی و نیشتەجێبووی تری لێکەوتەوە، جگە لە کەوتنەوەی زیانی مادی.

PM:04:56:09/10/2026

ئه‌م بابه‌ته 112 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت