ڕێککەوتنەکەی نێوان ئێران و عومان لە چەند ڕۆژی داهاتوودا بە فەرمی ڕادەگەیەنرێت

وێستگەنیوز

سەرچاوە عێراقییەکان بڵاویانکردەوە، ئێران و سوڵتانی عومان گەیشتوونەتە لێکتێگەیشتنێکی کۆتایی بۆ کردنەوەی گەرووی هورمز و بڕیارە لە چەند ڕۆژی داهاتوودا بە فەرمی ڕابگەیەنرێت.

سەرچاوەیەکی باڵا بە کەناڵە عەرەبییەکانی ڕاگەیاندووە، تاران و مەسقەت لەسەر هێڵە گشتییەکانی ڕێککەوتنی کردنەوەی گەرووی هورمز ڕێککەوتوون.

ڕێککەوتنەکە بۆ ماوەی 60 ڕۆژە و ئامانج لێی دەستپێکردنەوەی هاتوچۆی کەشتییەکانە لەو ڕێڕەوە ئاوییە گرنگەدا، بەڵام چاوەڕێی ڕەزامەندی کۆتایی ئەنجومەنی باڵای ئاسایشی نەتەوەیی ئێران دەکات.

بەپێی ڕێککەوتنە پێشنیازکراوەکە، شێوازی هاتوچۆی کەشتییەکان بەم شێوەیە ڕێکخراوە:

- ئەو کەشتییانەی دەچنە ناو گەرووی هورمز، ئەو ڕێڕەوە بەکاردەهێنن کە لە ئێرانەوە نزیکە.

- ئەو کەشتییانەی لە گەرووی هورمز دێنە دەرەوە، ئەو ڕێڕەوە بەکاردەهێنن کە لە سوڵتانی عومانەوە نزیکە.

خاڵە سەرەکییەکانی ڕێککەوتنەکە:

ڕێککەوتنەکە هیچ جۆرە ڕسوماتێک یان پارەیەک لەو کەشتییانە وەرناگرێت کە بە گەرووەکەدا تێدەپەڕن.

چەند لایەنێکی ناوچەیی بەشدار دەبن لە پاککردنەوەی گەرووەکە لە مین و دابینکردنی پێداویستییە تەکنیکییەکان بۆ پاراستنی هاتوچۆی کەشتییەکان.

ئەم هەنگاوە دەبێتە هۆی کاراکردنەوەی ماددەی 5 لەو یاداشتی لێکتێگەیشتنەی لە مانگی 6ی ڕابردوو لە نێوان واشنتۆن و تاران واژۆکرا، ئامانجیش لێی شکاندنی چەقەبەستوویی و دەستپێکردنەوەی گفتوگۆ تەکنیکییەکانی نێوان هەردوو وڵاتە.

سەرچاوەکە ئاشکراشی کردووە، پەیوەندییە ناڕاستەوخۆکانی نێوان ئەمریکا و ئێران لە ڕێگەی ناوەندگیرەکانەوە گەیشتووەتە قۆناغی کۆتایی.

هاوکات عەباس عێراقچی، وەزیری دەرەوەی ئێران، پەیوەندی بە فەرماندەی سوپای پاکستانەوە کردووە و بڕیارە لە کۆتایی ئەم هەفتەیەدا سەردانی ئیسلام ئاباد بکات.

لە لایەکی دیکەوە، بەرپرسانی پاکستان محەمەد بن سەلمان، شازادەی جێنشینی سعودیە، لە دواین پێشهاتەکانی گفتوگۆی نێوان تاران و واشنتۆن ئاگادار دەکەنەوە.

PM:04:51:06/08/2026

ئه‌م بابه‌ته 376 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت