هەوڵەکان بۆ کردنەوەی گەرووی هورمز؛ رێککەوتنێکی 5 خاڵی کرا

وێستگەنیوز-

وتووێژە نێودەوڵەتییەکان بۆ کردنەوەی گەرووی هورمز پێشوەچوونی بەرچاویان بەخۆوە بینی و لایەنەکان گەیشتنە رێککەوتنێکی سەرەتایی کە لە 5 خاڵی سەرەکی پێکدێت، بەڵام هێشتا ئاستەنگێکی گەورە لەبەردەم واژۆکردنی کۆتایی ماوە.

بەپێی زانیارییەکان، رێککەوتنە سەرەتاییەکە باس لە کردنەوەی رێڕەوە دەریاییەکە دەکات بۆ ماوەی 60 رۆژ، کە تێیدا لایەنەکان کار دەکەن بۆ لادانی مینەکان و دابینکردنی زەمینەی گونجاو بۆ پەڕینەوەی بێ پەککەوتنی کەشتییە بازرگانییەکان. هەروەها بڕیاردراوە سوڵتاننشینی عومان وەک لایەنێکی هەماهەنگیکار بەشداری پێبکرێت بۆ گێڕانەوەی جوڵەی ئاسایی دەریاوانی لە گەرووەکەدا.

لەگەڵ ئەوەشدا، خاڵێکی جێی مشتومڕ بووەتە رێگر لەبەردەم گەیشتن بە رێککەوتنی کۆتایی، ئەویش پێداگری تارانە لەسەر سەپاندنی باج لەسەر ئەو کەشتییانەی بە گەرووەکەدا تێدەپەڕن. لە بەرامبەردا، واشنتن بە توندی ئەو مەرجەی ئێرانی رەتکردووەتەوە و ناڕەزایەتی بەرامبەر دەربڕیوە.

چارەنووسی ئەم هەوڵە دیپلۆماسییە لە ئێستادا بەندە بە توانای لایەنەکان بۆ تێپەڕاندنی پرسی باجەکان، کە وەک گەورەترین ئاستەنگ لەبەردەم ئاساییبوونەوەی جوڵەی دەریاوانی لەو ناوچە ستراتیژییەدا ماوەتەوە.

PM:02:06:06/08/2026

ئه‌م بابه‌ته 172 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت