لەدوای دەست لەکارکێشانەوەی کێیەر ستارمەر کێبڕکێی توند بۆ سەرکردایەتی بەریتانیا دەست پێدەکات

وێستگەنیوز-

ئەمڕۆ دووشەممە 22ی حوزەیرانی 2026، کێیەر ستارمەر، سەرۆک وەزیرانی بەریتانیا بە فەرمی دەستی لەکارکێشایەوە و وتی: "من وەک سەرۆک وەزیران دەمێنمەوە تاکو کەسێک دەستنیشان دەکرێت و هەروەها وەک سەرکردەی حزبەکەم دەستلەکار دەکێشمەوە"، ئەم بڕیارەش گۆڕانکارییەکی گەورەی لە گۆڕەپانی سیاسی ئەو وڵاتەدا دروست کردووە و کێبڕکێیەکی توندی بۆ گەیشتن بە سەرکردایەتی پارتی کرێکاران و سەرۆکایەتی حکومەت دەستپێکردووە.

ستارمەر داوای لە دەستەی باڵای پارتەکەی کردووە خشتەیەکی کاتی بۆ دیاریکردنی جێگرەوەکەی دابنێن، کە بڕیارە لە 9ی تەمموزەوە دەست پێبکات و تا پێش مانگی ئەیلوول سەرکردەیەکی نوێ دەستبەکار بێت، ناوبراو جەختی کردەوە کە هەموو هەوڵێکی خۆی دەدات بۆ گواستنەوەیەکی رێکوپێکی دەسەڵات.

لە ئێستادا ئاندی بێرنهام، وەک یەکێک لە رکابەرە سەرەکییەکان دەبینرێت کە گەڕاوەتەوە بۆ پەرلەمان و پێشبینی دەکرێت پشتگیرییەکی زۆری هەبێت، هاوکات وێس ستریتینگ، وەزیری پێشووی تەندروستی رایگەیاندووە کە پشتگیری پێویستی بۆ کاندیدبوون هەیە، هەروەها ئال کارنز، ئەفسەری پێشووی هێزی دەریایی شاهانەش ئارەزووی خۆی بۆ چوونە ناو کێبڕکێیەکە نیشانداوە.

بەپێی یاساکانی پارتی کرێکاران، پرۆسەی کاندیدبوون ئاڵۆزە، سەرەتا دەبێت کاندیدەکە پشتگیری 81 پەرلەمانتاری پارتەکە (%20ی کۆی پەرلەمانتاران) بەدەست بهێنێت، دواتر پێویستە لەلایەن%5ی لقەکانی پارتەکە یان سێ رێکخراوی سەر بە پارتەکە کە دوانیان سەندیکای کرێکاران بن کاندید بکرێن، تەنها دوای بڕینی ئەم قۆناغانە، کاندیدەکان دەخرێنە بەردەم دەنگی ئەندامانی پارتەکە.

رەنگە ئاندی بێرنهام بەهۆی پشتگیرییە زۆرەکەیەوە ببێتە تاکە بەربژێر، کە ئەمەش وادەکات پرۆسەی هەڵبژاردنەکە لە ماوەی چەند رۆژێکدا کۆتایی بێت و وەک تاجگوزاری ناو دەبرێت، بەڵام بێرنهام داوای ماوەیەکی گواستنەوە دەکات تا مانگی ئەیلوول، ئەمەش ستارمەر وەک سەرکردەیەکی بێ دەسەڵات دەهێڵێتەوە، لە کاتێکدا بەریتانیا لە بەردەم دوو رووداوی گرنگدایە کە ئەوانیش لووتکەی ناتۆ و لووتکەی نێوان بەریتانیا و یەکێتی ئەوروپان.

ئەم دۆخە هاوشێوەی ساڵی 2007ە، کاتێک گۆردن بڕاون بووە تاقە بەربژێر بۆ سەرکردایەتی پارتی کرێکاران پێش ئەوەی تۆنی بلێر بە فەرمی پۆستەکەی بەجێبهێڵێت.

PM:12:23:22/06/2026

ئه‌م بابه‌ته 252 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت