قرقاش: ئێران دەستدرێژیکار و سەرچاوەی مەترسی و هەڕەشەیە لەناوچەکەدا
وێستگەنیوز-
رۆژێک دوای هێرشە
موشەکییەکانی ئێران بۆ سەر ئیمارات، ئەنوەر قرقاش، راوێژکاری دیپلۆماسیی سەرۆکی ئەو
وڵاتە، رایگەیاند کە رژێمی ئێران "دەستدرێژیکار" و "بەرپرسی پەرەسەندنی
قەیرانەکانە لە کەنداودا".
لە کاتێکدا ئیمارات، کۆماری
ئیسلامی بە بەرپرسیار دەزانێت لە هێرشەکانی ڕۆژی دووشەممە بۆ سەر بەندەری فوجەیرە
و ناوچەکانی دیکەی ئەو وڵاتە، قرقاش ڕۆژی سێشەممە لە تۆڕی کۆمەڵایەتی ئێکس نووسیویەتی کە ڕژێمی ئێران "سەرچاوەی مەترسی و هەڕەشەیە
بۆ سەر ئاسایش و سەقامگیری" ناوچەکە.
ناوبراو هەروەها سوپاسی
"پەیامەکانی هاوپەیمانیی وڵاتانی کەنداو، وڵاتانی عەرەبی و کۆمەڵگەی نێودەوڵەتی
لەگەڵ ئیماراتی یەکگرتووی عەرەبی" کرد، کە تێیدا هێرشە "دڕندانەکەی"
ئێرانیان شەرمەزار و ڕەت کردووەتەوە.
قرقاش نووسیویەتی کە ئەم
پەیامانە "ڕەنگدانەوەی پابەندبوونی کۆمەڵگەی نێودەوڵەتییە بە سیستمێکی بنەمادار
بە بەهاکان و بەرپرسیارێتی؛ سیستمێک کە ڕەفتارە سەرکێشەکان ڕەت دەکاتەوە و ئەنجامدەرانی
گۆشەگیر دەکات."
دوێنێ دووشەممە وەزارەتی
بەرگریی ئیمارات رایگەیاند، ئەمڕۆ سیستمی بەرگریی ئاسمانیی وڵاتەکەیان کەوتووەتە
کار و توانیویانە 12 موشەکی بالیستی، سێ موشەکی کرووز و چوار درۆن تێکبشکێنن کە لە
ئێرانەوە ئاراستە کرابوون.
هاوکات وەزارەتی دەرەوەی
ئیمارات بە «تیرۆریستی» ناوبردنی ئەم هێرشانە، لە بەیاننامەیەکدا ڕایگەیاند، هیچ هەڕەشەیەک
دژی ئاسایش و سەروەریی ئیمارات قبوڵ ناکەن و هۆشداریشی دا کە «مافی تەواو و ڕەوای»
وەڵامدانەوەی ئەم هێرشانەی بۆ خۆی پاراستووە.
AM:11:06:05/05/2026
ئهم بابهته 240
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت