پزیشکیان: ئێمە بەدوای چەکی ئەتۆمییەوە نین و ناشبین

وێستگەنیوز-

سەرۆک کۆماری ئێران رایدەگەیەنێت، وڵاتەکەمان بە هیچ شێوەیەک بەدوای چەکی ئەتۆمییەوە نییە، ئاماژە بەوەشدەکات، هیوادارین جیهان و ئەمریکاش ئەوە بزانن.

مەسعود پزیشکیان، سەرۆک کۆماری ئێران لە دیدارێکدا رایگەیاند، "ئێمە چەندین جار رامانگەیاندووە، راگەیاندنی من گرنگ نییە فەتوا و سیاسەتی رێبەری باڵا لە رووی بیروباوەڕەوە گرنگە، بە هیچ شێوەیەک بە دوای دروستکردنی چەکی ئەتۆمییەوە نین و ناشبین".

ئاماژەی بەوەکرد، "بە هەر شێوەیەک دەیانەوێ دەتوانن بێن و پشکنین بۆ دامەزراوەکانمان بکەن، بەڵام دەستبەرداری پیشەسازیی ئەتۆمیی ئاشتیانە بۆ مەبەستی پزیشکی، کشتوكاڵی و پیشەسازی و هتد نابین، پیشەسازیی ئەتۆمیی ئاشتیانە بۆ جەنگ نییە، بۆ بەڕێوەبردن و پێشکەوتنی وڵاتە".

پزیشکیان وتی، "هیوادارین جیهان و ئەمریکاش ئەوە بزانن کە بابەتی ئەوەی ئێمە دەمانەوێت چەکی ئەتۆمی دروست بکەین پڕوپاگەندەیە، هەڵبەت ئەوان دەیانەوێت ئەم بابەتە بسەپێنن، بەڵام ئەم هەوڵەیان لەگەڵ بیرو باوەڕی ئێمە جیاوازە".

AM:11:16:18/02/2026

ئه‌م بابه‌ته 96 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت