ترەمپ بۆ خامنەیی: پێویستە نیگەران بیت

وێستگەنیوز-

ئەمڕۆ چوارشەممە 4ی شوباتی 2026، دۆناڵد ترەمپ، سەرۆکی ئەمریکا لە نوێترین پەیامیدا رایگەیاند: "پێویستە عەلی خامنەیی، رێبەری باڵای ئێران نیگەران بێت".

ئاماژەی بەوەکرد، "ئێمە بەبێ لەناوبردنی توانا ئەتۆمییەکانی ئێران، ئاشتیمان لە ڕۆژهەڵاتی ناوەڕاست بەدەست نەدەهێنا".

ئەوەشی خستەڕوو، "هەوڵەکانی ئێران بۆ دەستپێکردنەوەی بەرنامە ئەتۆمییەکەی و کردنەوەی دامەزراوەی نوێ، ئەمریکا ناچار دەکات هەنگاوی زۆر تووند بگرێتەبەر".

سەرۆکی ئەمریکا دووپاتیکردەوە، "پشتیوانی لە خۆپیشاندەرانی ئێران دەکەین و وڵات لە ئاژاوەدایە".

ئەم پەیامەی سەرۆکی ئەمریکا لە کاتێکدایە، ئەمڕۆ دوو بەرپرسی ئەمریکا بە ئاکسیۆس-یان راگەیاندووە، "ئەمریکا بە ئێرانی راگەیاندووە کە بە داواکارییەکانی تاران ڕازی نابێت بۆ گۆڕینی شوێن و تەوەری ئەو دانوستانانەی کە پلانی بۆ دانراوە بۆ ڕۆژی هەینی".

ئێران داوای کردووە لە مەسقەتی عومان بەڕێوە بچێت و هێڵی سووری داناوە لەسەر باسکردنی بەرنامە مووشەکییەکان، ئەمریکاش ئەمەی رەتکردووەتەوە.

PM:10:36:04/02/2026

ئه‌م بابه‌ته 152 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت